Олон нийтийн сүлжээгээр ОХУ-д шатахууны үнэ нэмэгдэж, тасалдал үүссэнтэй холбоотойгоор манай улсад ч мөн хомсдол нүүрлэж, үнэ өснө гэсэн мэдээлэл цацагдах болсон. Тэгвэл энэхүү мэдээллийг буруу ташаа хэмээн Аж үйлдвэр, эрдэс баялгийн яамнаас залруулж, бодит нөхцөл байдлыг танилцууллаа.

АҮЭБЯ-ны Төрийн нарийн бичгийн дарга Б.Дашпүрэв: "Өнөөдрийн байдлаар манай улсад шатахууны нөөц хангалттай байгаа тул хомсдол үүсэх ямар ч үндэслэл байхгүй гэнэ. Тодруулбал, АИ-92 шатахууны 33 хоногийн, АИ-95 шатахууны 44 хоногийн, харин дизель түлшний 27 хоногийн ердийн хэрэглээний нөөц бэлэн байна. Тэр дундаа дизель түлшний хувьд үнэ буурах нөхцөл байдалтай хил дээр ирсэн байна.

Манай улс ОХУ-тай АИ-92 шатахууныг тонныг нь 705 ам.доллароор тогтвортой нийлүүлэх гэрээ байгуулан ажиллаж байгаа юм. Гэрээ ёсоор үнэ 30 хувиас дээш нэмэгдсэн тохиолдолд 3 сарын дараа үнийг эргэж харах нөхцөлтэй. Сүүлийн дөрвөн сарын хугацаанд үнэ тодорхой хэмжээгээр өссөн учраас цаашид үнэд өөрчлөлт орж болзошгүй ч наадмын өмнө болон наадмын үеэр үнэ нэмэгдэх, хангамж тасалдах ямар ч асуудал үүсэхгүй гэдгийг албаныхан онцоллоо. ОХУ ч гэрээний үүргээ баримтлан шатахуунаа хэвийн нийлүүлж байна.

Харин наадмын дараа буюу долоодугаар сарын 20-доор Шатахууны үнийн зөвлөл хуралдаж, зах зээлийн нөхцөл байдалд тохируулан зарим бүтээгдэхүүний үнийг бууруулах, заримыг нь нэмэх асуудлыг эргэн хэлэлцэхээр төлөвлөжээ." хэмээлээ.