Үндэсний хэмжээнд хэрэгжиж буй “Тэрбум мод” хөдөлгөөний хүрээнд Сэлэнгэ аймаг 2030 он хүртэл 20.0 сая мод тарих гэрээ байгуулсан бөгөөд одоогийн байдлаар 22.4 сая ширхэг мод тарьж ургуулан амлалтаа 100 хувь биелүүлж, бэлтгэл ажлаа бүрэн хангаад байна.

Аймаг орон нутгийн хэмжээнд уг хөдөлгөөн гурван үндсэн зорилтын хүрээнд хэрэгжиж байгаа бөгөөд тодорхой үр дүнд хүрэхээр ажиллаж байна.

Гол зорилтууд:

1. Цөлжилт, элсний нүүдлийг зогсоох хамгаалалтын ойн зурвас байгуулах
2. Доройтсон ойг нөхөн сэргээх, ойжуулалт хийх
3. Уул болон ойн сангийн талбайд ойжуулалт хийх

Хамгаалалтын ойн зурвасын ач холбогдол

Ойн зурвас байгуулах нь олон талын ашиг тустай бөгөөд байгаль орчин, хөдөө аж ахуйн салбарт чухал нөлөөтэй. Тухайлбал:

• Салхины хүчийг сааруулах – Ингэснээр хөрсний чийгийг хадгалж, ууршилтыг багасгана.
• Цас, борооны усыг хөрсөнд шимэгдүүлэх – Хөрсийг угаагдахаас сэргийлж, ургамлын ургах таатай нөхцөлийг бүрдүүлнэ.
• Тариалангийн талбай, бэлчээрийг хамгаалах – Үржил шимт хөрсийг хийсэх, эвдрэхээс хамгаалж, ургамлын өсөлтийг дэмжинэ.
• Цөлжилтийг зогсоох – Элс бүхий талбайн хэмжээг нэмэгдэхээс сэргийлнэ.

Хамгаалалтын ойн зурваст тарих мод, сөөгний төрөл

Тариалангийн бүсэд хайлаас, улиас, гүйлс, жигд, бургас, нарс зэрэг мод, сөөгийг 10-20 метрийн өргөнтэй зурвас болгон тарих боломжтой.

Сэлэнгэ аймаг "Тарьц суулгац нийлүүлэг аймаг" болох зорилтоо биелүүлэхийн зэрэгцээ улс орон даяарх ойжуулалтын үйл ажиллагаанд манлайлан оролцож байна.