Бусдын эд хөрөнгийг илээр хүч хэрэглэхгүйгээр хууль бусаар авах, эсвэл хүч хэрэглэн, хүч хэрэглэхээр заналхийлэн авах нь Эрүүгийн хуулийн 17 дугаар бүлэгт зааснаар дээрэмдэх гэмт хэрэгт тооцогддог.

Тэгвэл энэ оны гуравдугаар сарын 15-ны өдөр Сансарын Петровис ШТС-ын хажууд дээрмийн хэрэг гарсан талаар цагдаагийн байгууллагад 05:57 цагт дуудлага мэдээлэл иржээ. Дуудлагын дагуу шалгалтын ажиллагаа явуулахад 22 настай эмэгтэй Х-г 19 настай эрэгтэй Б биед нь халдаж, Samsung S23 загварын гар утсыг нь дээрэмдэн зугтаасан болох нь тогтоогдсон байна. 

Баянзүрх дүүргийн цагдаагийн газрын 2 дугаар хэлтсийн алба хаагчид шуурхай эрэн сурвалжлах ажиллагаа явуулж, гэмт этгээдийг илрүүлэн баривчилсан байна.

Цагдаагийн байгууллагаас иргэдийг оройн цагаар сонор сэрэмжтэй байх, гэрэлтүүлэг сайтай, хяналтын камертай газраар явах, согтууруулах ундааг хэтрүүлэн хэрэглэхээс зайлсхийх зэрэг арга хэмжээ авч, болзошгүй эрсдэлээс урьдчилан сэргийлэхийг зөвлөж байна.