Төрийн болон орон нутгийн өмчийн бүх музей өнөөдөр /2020.09.01/-өөс эхлэн 18 хүртэлх насны хүүхдэд үнэ төлбөргүй үйлчлэх тушаалыг Соёлын сайд С.Чулуун баталжээ. Уг тушаалд төрийн болон орон нутгийн өмчийн музейн байнгын болон түр үзэсгэлэнгийн танхимаар 2020 оны есдүгээр сарын 1-ний өдрөөс эхлэн 18 хүртэлх насны хүүхдүүдийг үнэ төлбөргүй үйлчлүүлэхээр болсон байна.
Өнгөрөгч 2018 онд "Музейн нээлттэй өдрүүд"-ийг пүрэв гаригаас эхлэн долоо хоногийн турш орон даяар музейг иргэдэд үнэ төлбөргүй үзүүлэх, танилцуулж байсан удаатай. Улаанбаатар хотын хэмжээнд 10 гаруй музей үйл ажиллагаа явуулдаг ажээ.
Засгийн газраас Соёлын яамыг шинээр байгуулж долоон газар, 78 албан хаагчтай байхаар баталсан. Шинэ яам Боловсрол, шинжлэх ухааны яамны байрнаас өрх тусгаарлаад байгаа билээ.
Шинэ яамны сайдаар Шинжлэх ухааны академийн Түүх, археологийн хүрээлэнгийн захирлаар ажиллаж байсан С.Чулуун, дэд сайдаар нь архитекторч М.Батбаяр, Төрийн нарийн бичгийн даргаар Гавьяат жүжигчин Г.Эрдэнэбат томилогдсон. Бусад албан хаагчдыг ажил үүрэгт нь томилсоны дараагаар албан ёсны байранд шилжинэ гэдгийг Соёлын яамнаас мэдээлсэн.
