Халхын голын байлдааны ялалтын 85 жилийн ойн хүрээнд Хил хамгаалах байгууллага, “Мандала фильмс” продакшн хамтран “Зарлаагүй дайны гэрч” баримтат киног бүтээсэн билээ. Тэгвэл тус баримтат киноны нээлт 2024 оны есдүгээр сарын 13-ны өдөр ХХЕГ-ын Соёлын төвд боллоо. Нээлтийн арга хэмжээнд түүхийн ухааны доктор, бэлтгэл хурандаа Ч.Алтангэрэл, “Мандала фильмс” продакшны гүйцэтгэх захирал М.Батцэрэн, дууны найруулагч Г.Батмөнх, эвлүүлгийн найруулагч Г.Ганболд, продюссер Б.Ганзориг, зураглаач Н.Мөнхбаатар, Н.Бат-Оргил нар уригдан оролцлоо. Тус баримтат кино нь Халхын голын дайнд хилчдийн байгуулсан гавьяаг тодотгон харуулснаараа онцлог бөгөөд Хилчдийн баярын өдрийг тохиолдуулан есдүгээр сарын 16, 17-ны өдрүүдэд олон нийтийн телевизийн эфирээр цацагдах юм.
