Хотын дарга Х.Нямбаатар цаг үеийн нөхцөл байдал болон цаашид хэрэгжүүлэх арга хэмжээний талаар мэдээлэл хийлээ.
Агаарын бохирдлыг бууруулах хоёр үндсэн эх үүсвэрийг бууруулах чиглэлээр ямар арга хэмжээ авах вэ гэдэг Засгийн газрын тэргүүний асуусан асуултад нийслэлээс би дараах байдлаар хариулт өгч байгаа.
Түгжрэлтэй холбоотой Туулын хурдны замын төсвийг бүрэн тавьсан. Тойрог хурдны замын зөвлөх үйлчилгээний багийг тодруулах тендер шалгаруулалт дууссан. Одоо нэг, хоёрдугаар хурдны замын консевт дизайн гаргах урьдчилсан ТЭЗҮ-г гаргах, улмаар ТЭЗҮ-г Тээврийн хөгжлийн төвөөр батлуулах бэлтгэл ажил хийгдэж байгаа. Энэ батлагдсан тохиолдолд бид тойрог хурдны замын эх үүсвэрийг шийдэх боломжууд бүрдэж байна. Яагаад гэвэл замын сангийн хураамжууд нэмэгдсэн. Албан болон өөрөө явагч хэрэгслийн татварын хувь хэмжээ нэмэгдсэнтэй холбоотой эх үүсвэрүүд бий болсон. Бид олон улсын зөвлөх инженерүүдийн холбооны үлгэрчилсэн дүрмийн дагуу ТЭЗҮ-ээ боловсруулж, тендерээ зарлах бэлтгэл ажил явагдаж байна. Метротой холбоотой санхүүгийн асуудлууд ерөнхийдөө шийдэгдсэн. Энэ долоо хоногт Их Британийн засгийн газраас Сангийн яам болон манай Засгийн газарт 3 тэрбум фунт стерлингийн 15 жилийн хугацаанд метроны төсөлд гаргах баталгааны бичиг ирэхээр болж байгаа.
