Б.УУГАНБАЯР
Их Британийн нэрт жүжигчин Бернард Хилл 79 насандаа таалал төгссөнийг гэр бүлийнхэн нь өчигдөр мэдээллээ. Тэрээр Жеймс Камероны бүх цаг үеийн алдарт бүтээл “Титаник” болон Петр Жэксоны “Бөгжний эзэн” кинонуудад дүр бүтээж кино сонирхогчдын сэтгэлд нийцсэн нэгэн байсан юм.
Хилл 1982 онд “Блэкстафын хөвгүүд” кинонд анх тоглож жүжигчний гараагаа эхэлж байжээ. Мөн “Ганди”, “Ширлийн Валентин”, “Хилэнцийн хаан”, “Хаан эргэж ирсэн нь” зэрэг кинонуудад дүр бүтээсэн байна.
Жеймс Камероны Оскарын шагналт бүтээл “Титаник”-ын ахмад Эдвард Смитийн дүр, “Бөгжний эзэн” цувралын Роаны хаан Теодены дүрүүд нь үзэгчдээс өндөр үнэлгээ авсан юм. Түүний таалал төгссөн явдалд Британийн болон Америкийн кино урлагийн салбарын мэргэжилтнүүд гүн эмгэнэл илэрхийлж байна.
Эх сурвалж: CNN.com
|
Урлаг соёл
