Монголын сонгодог болон орчин үеийн хөгжмийн бүтээлүүдийг нэгэн тайзнаа эгшиглүүлэх тансаг үдэш үзэгчдийг хүлээж байна. Тоглолтод төгөлдөр хуурч, Монгол Улсын Урлагийн гавьяат зүтгэлтэн Б.Чинбат, хийлч Б.Билгүүн нар оролцож, нийт 20 гаруй сонгодог, Монголын орчин үеийн болон дэлхийн хөгжмийн сор бүтээлүүдийг толилуулах юм.

110 минут үргэлжлэх тоглолт нь хийлчийн гоцлол, төгөлдөр хуурын гоцлол болон хамтарсан үзүүлбэр гэсэн хэсгүүдээс бүрдэх бөгөөд үзэгчдэд хөгжмийн өндөр мэдрэмж, тав тухтай орчныг санал болгохоороо онцлог аж. Мөн зочдод дарс, коктейл, хөнгөн хоол, зуушаар үйлчлэхээр бэлтгэжээ.

Үүний зэрэгцээ Emotion хамтлаг шинэ уран бүтээлээ сонсогчдод хүргэж буйгаа танилцууллаа. Дууны аяыг Урлагийн гавьяат зүтгэлтэн Б.Чинбат болон хамтлагийн гишүүн Э.Ганболор нар хамтран зохиосон бол үгийг Toonot-ийн уран бүтээлч O.Z буюу Э.Золбоо бичжээ.

Шинэ бүтээл нь эмэгтэй хүн өөрийгөө үнэлж, хайрлаж чадсанаар аз жаргалтай амьдралын үндэс бүрддэг гэх санааг гол агуулгаа болгосон байна. Мөн өөрийгөө үнэгүйдүүлэхгүй байх, эмэгтэйчүүдийг зоригжуулах, хайрлах мэдрэмж төрүүлэхийг зорьсноороо онцлогтой аж.

Дууны клипийг Curves Entertainment бүтээж, найруулагчаар Д.Баасанжаргал ажилласан байна. Харин make-up, stylist-аар Scuti professional team, Tuka’s Hair Salon, загварын хамтрагчаар ADL - Mongolia оролцжээ.

Үзэх:

Emotion хамтлаг өмнө нь “UB is My Heart”, “Нандин”, “Дуулъя” feat. Tsetse зэрэг уран бүтээлүүдээ олонд хүргэсэн бөгөөд энэ онд “Зав алга” зэрэг шинэ дуу болон анхны цомгийн зарим бүтээлээ шинэчилсэн хувилбараар хүргэхээр ажиллаж буйгаа онцоллоо.