Б.БИЛЭГСАЙХАН
Өмнөд Солонгосын K-pop урсгалын охидын хамтлаг Red Velvet хоёр жил гаруйн дараа бүрэн бүрэлдэхүүнээрээ эргэн ирж, өнөөдөр шинэ "Velvet Summer" нэртэй мини цомгоо танилцуулна.
Хамтлагийн агентлаг SM Entertainment-ийн мэдээлснээр, шинэ цомог орон нутгийн цагаар 18:00 цагт цацагдах бөгөөд гол дуу нь "Surfin' Boy" нэртэй бүжгийн хэмнэлтэй бүтээл юм. Тус дууг хамтлагийн гишүүдийн "сэрүүн атлаа мөрөөдөмтгий" өнгө аястай хоолойн зохицлоороо онцлог гэж тодорхойлжээ.
Red Velvet-ийн хамгийн сүүлд бүрэн бүрэлдэхүүнээрээ гаргасан уран бүтээл нь 2024 оны зургаадугаар сард гарсан "Cosmic" мини цомог байсан юм. Үүнээс хойш хамтлагийн гишүүд дуу хөгжим, жүжиг болон бусад бие даасан төслүүдэд төвлөрөн ажиллажээ.
Шинэ цомгийн нээлтийн өмнө хамтлагийн ахлагч Айрин фенүүддээ талархал илэрхийлсэн байна.
Тэрээр "Хоёр жил гаруй хугацаанд биднийг тэвчээртэй хүлээсэн ReVeluv фенүүддээ чин сэтгэлээсээ баярлалаа. Бүгдээрээ дахин нэгдэж, бэлтгэлийн өрөөнд хамтдаа ажиллаж байгаа бүхэн үнэхээр сайхан санагдаж байна" хэмээн хэлжээ.
|
Урлаг соёл
