ТАТАР МАЙДАР)
Монголын эмэгтэй сагсан бөмбөгийн үндэсний шигшээ багийн бүрэлдэхүүнд олон улсын түвшний хүчирхэг легионер тоглогч нэгдэх алхам ойртлоо.
Эмэгтэйчүүдийн үндэсний дээд лиг болон "WBL Asia" тэмцээнд "Ulaanbaatar Amazons" багийг төлөөлөн тоглож буй АНУ-ын тоглогч Амари Робинсон (Amari Robinson) Монгол Улсын иргэншил авах хүсэлт гаргасан байна.
Хэрэв түүний хүсэлт хууль ёсны дагуу шийдэгдэж, Олон улсын сагсан бөмбөгийн холбоо (FIBA)-ноос албан ёсны зөвшөөрөл олгобол тэрээр Монгол Улсын нэрийн өмнөөс Азийн цом (Asia Cup) тэргүүтэй 5х5 болон 3х3-ын бүхий л томоохон тэмцээнд оролцох эрхтэй болох юм.
Амари Робинсон нь АНУ-ын оюутны сагсан бөмбөгийн дээд дивизион буюу NCAA-д амжилттай тоглож, "Clemson" их сургуулийг дүүргэсэн чансаатай тоглогч юм. Тэрээр Итали, Австралийн мэргэжлийн лигүүдэд тоглож байсан арвин туршлагатай төв болон хүчний довтлогчийн байрлалын тоглогч юм. Тэрээр 184 см өндөртэй бөгөөд манай улсад ирсэн цагаасаа хойш өөрийн ур чадварыг батлан харуулсаар ирсэн. Ялангуяа, 2026 оны 6 дугаар сард Улаанбаатар хотноо зохион байгуулагдсан "FIBA 3x3 Women's Series" тэмцээнд "Ulaanbaatar Amazons" багийг тэргүүлэн аварга болгож, тэмцээний Үнэ цэнэтэй тоглогч (MVP)-оор шалгарч байв.
Монголын эмэгтэй сагсан бөмбөгийн баг олон улсын түвшинд нурууны өндөр болон самбар доорх тоглолтын хувьд дутагдалтай байдаг бөгөөд Амари Робинсон шигшээ багт нэгдсэнээр энэхүү сул талыг бүрэн нөхөж, Азийн тавцанд түүхэн амжилт үзүүлэх том боломж нээгдэнэ гэж мэргэжилтнүүд үзэж байна.
Албан ёсны шийдвэрүүд хэрхэн гарахыг Монголын сагсан бөмбөгийн холбоо болон хөгжөөн дэмжигчид анхааралтай ажиглаж байна.
Амари Робинсоны товч намтар
Амари Ж’Нэй Робинсон (Amari J'Nae Robinson) нь 2000 оны 3 дугаар сарын 6-ны өдөр АНУ-ын Жоржиа мужийн Дугласвилл (Douglasville, Georgia) хотод төрж өссөн, өдгөө 26 настай. Тэрээр спортын өндөр гентэй гэр бүлээс гаралтай бөгөөд түүний эцэг Кэйт Робинсон АНУ-ын алдартай "Notre Dame" сургуулийн сагсан бөмбөгийн багт тоглож байсан бол, эх Андреа Робинсон нь "Providence" коллежийн сагсан бөмбөгийн Алдрын танхимын гишүүн, сургуулийнхаа түүхэн дэх шилдэг тоглогчдын нэг юм.
Амари Робинсон дунд сургуулиа төрөлх хотынхоо "Douglas County" ахлах сургуульд амжилттай дүүргэж, улмаар АНУ-ын оюутны спортын дээд ангилал болох NCAA-ийн хүчирхэг "Clemson Tigers" багт 5 жилийн турш амжилттай тоглож, 2024 онд Тусгай боловсролын чиглэлээр их сургуулиа төгссөн. Коллежийн карьертаа тэрээр нэр хүндтэй ACC конференцийн бэлгэдлийн багуудад нэрлэгдэж байсан төдийгүй Европ (Италийн дээд лиг) болон Австралийн мэргэжлийн лигт тоглож байсан арвин туршлагатай тоглогч юм.
|
Спорт
