ТАТАР МАЙДАР)
Монголын волейболын спортын түүхэнд нэгэн шинэ хуудас нээгдэж, үндэсний шигшээ баг болон "Хасу Мегастарс" клубийн тамирчин Мөнхбаярын Уранбаяр Балба улсын волейболын дээд лигт (Nepal Volleyball League) өөрийн ур чадвараа гайхуулан, ээлжит нэгэн томоохон амжилтыг гаргалаа.
Лигийн хүчтэй өрсөлдөгчдийн нэг "Annapurna Spiker Kings" багт легионер тамирчнаар уригдан тоглож буй Мөнхбаярын Уранбаяр тус тэмцээний 5 дахь тоглолтод (Match 5) багийнхаа ялалтын гол түлхүүр нь байж, "Тоглолтын шилдэг тоглогч" (Player of the Match) алдрыг хүртсэн байна.
"Annapurna Spiker Kings" болон "Kathmandu Reds" багуудын хооронд өрнөсөн тус тулаан туйлын ширүүн, өрсөлдөөнтэй болсон бөгөөд Мөнхбаярын Уранбаяр 8 дугаартайгаар талбайд гарч, шийдвэрлэх чухал мөчүүдэд довтолгоо болон хамгаалалтыг гайхалтай гүйцэтгэсэн юм. Түүний энэхүү дайчин, даацтай тоглолтын ачаар "Annapurna Spiker Kings" баг чухал ялалт байгуулж, лигийн чансаагаа ахиулж чадлаа.
Тэмцээний дараа зохион байгуулагчид болон волейболын мэргэжилтнүүд түүний гүйцэтгэлийг "Багаа хүнд мөчөөс аварсан, талбайг бүрэн удирдсан гайхалтай тоглолт" хэмээн өндрөөр үнэлсэн байна. Мөн Балбын волейболын холбоо болон тус багийн зүгээс албан ёсны хуудсуудаараа дамжуулан Монгол тамирчны ур чадварыг бахархан сайшааж, баяр хүргэжээ.
Мөнхбаярын Уранбаяр нь эх орноо төлөөлөн хилийн чанадад мэргэжлийн лигт амжилттай тоглож, Монголын волейболын спортын хөгжил, тамирчдын чансааг олон улсад таниулсаар байна. "Annapurna Spiker Kings" багийн дараагийн тоглолтууд үргэлжлэн явагдах бөгөөд манай тамирчныг илүү өндөр амжилт гаргана гэдэгт волейбол сонирхогчид болон спорт сонирхогч олон итгэл дүүрэн хүлээж байна.
|
Спорт
