Элон Маск өөрийн нийгмийн сүлжээ болох X платформын үйл ажиллагаанд гарсан томоохон доголдлын дараа бизнесүүддээ илүү их анхаарал хандуулахаар болсноо мэдэгджээ.

Тэрээр X дээр дараах бичвэрийг нийтэлсэн байна: "Ажлаа 24/7 хийж, хурал, сервер, үйлдвэрийн өрөөнүүдэд унтдаг горимдоо буцаж орж байна. Би X / xAI, мөн Tesla дээр маш их төвлөрөх ёстой (дараа долоо хоногт Starship хөөрнө), учир нь бид чухал технологиудыг нэвтрүүлж байна. Энэ долоо хоногийн X-ийн ажиллагааны доголдлоос харахад, үндсэн үйл ажиллагаандаа томоохон сайжруулалт хийх шаардлагатай байна," хэмээн бичжээ. Энэ нь бямба гарагт X платформд гарсан өргөн хүрээний доголдлуудыг хэлж буй хэрэг юм.

Downdetector сайтын мэдээлснээр, АНУ-д ойролцоогоор 25,800 хэрэглэгч X-ийн ажиллагаанд саатал гарсан тухай мэдээлсэн байна. Мөн Их Британи, Франц, Япон болон бусад зарим оронд ч доголдол бүртгэгджээ.

Харин 4-р сард Маск АНУ-ын Засгийн газрын Үр ашигтай ажиллагааны хэлтэс (Department of Government Efficiency буюу DOGE)-ийн ажилд оролцоогоо тавдугаар сараас багасгана гэж мэдэгдсэн. Энэ нь Tesla компанийн 2025 оны эхний улиралд цэвэр орлого нь өнгөрсөн оныхоос 71%-иар буурсан тухай мэдээллийн дараа гарсан юм. Шинжээчдийн үзэж байгаагаар, Маскийн улс төрийн үйл ажиллагаа DOGE-ийн тэргүүнээр ажиллаж байх хугацаандаа Tesla брэндийн нэр хүндэд сөргөөр нөлөөлсөн нь энэ уналтын нэг шалтгаан болсон аж.