Дэлхийн технологийн томоохон Майкрософт компани өөрийн олон жилийн түүхтэй тоглоомын брэнд болох Xbox-ийн ирээдүйн стратегийг бүрэн өөрчилж, бүтцийн томоохон шинэчлэл хийхээр бэлтгэж байна. Салбарын шинжээчдийн мэдээлж буйгаар тус компани тоглоомын салбартаа томоохон хэмжээний цомхотгол хийхээр төлөвлөж байгаа бөгөөд дараагийн үеийн консол болох "Project Helix"-ийн төслийг ч эргэн харахаар хойшлуулаад байгаа аж.

Энэхүү үйл явдлын хамгийн шуугиантай хэсэг нь Майкрософт корпораци Xbox брэндийг өөрийн үндсэн бүтцээс тусгаарлах хэд хэдэн хувилбарыг дотооддоо нууцаар судалж эхэлсэн явдал юм. Эдгээр хувилбаруудад:

• Xbox-ийг санхүүгийн хувьд бие даасан, бүрэн эзэмшлийн охин компани болгох,

• Өөр нэгэн аварга корпораци эсвэл хөрөнгө оруулалтын сантай хамтарсан компани (Joint Venture) байгуулах,

• Эсвэл Xbox брэндийг тэр чигт нь өөр компанид худалдах (Spin-off) хүртэлх эрс шийдвэмэг алхмууд багтсан байна.

Спортын болон технологийн шинжээчдийн үзэж буйгаар "Майкрософт" сүүлийн жилүүдэд Activision Blizzard болон Bethesda зэрэг тоглоомын аварга студиудыг худалдаж авахын тулд 80 гаруй тэрбум долларын асар том хөрөнгө оруулалт хийсэн. Гэвч энэхүү зардал нь эргээд корпорацийн санхүүгийн тайланд хүнд дарамт болж эхэлсэн бөгөөд Xbox консолын борлуулалт өрсөлдөгч Sony PlayStation-ыг гүйцэхгүй байгаа нь удирдах зөвлөлийг зардлаа яаралтай танах хүйтэн тооцоолол хийхэд хүргэжээ.

Одоогоор ямар нэгэн эцсийн шийдвэр гараагүй байгаа ч энэхүү мэдээлэл нь Xbox-ийг зөвхөн "тоглоом сонирхогчдын хайртай брэнд" биш, "Майкрософт"-ын өсөлт, зардлын стратегийн хамгийн эрсдэлтэй хэсэг болсныг батлан харуулж байна.

Хэрэв Xbox-ийн бүтэц өөрчлөгдөж, Майкрософтоос тусгаарлагдвал энэ нь дэлхийн консолын зах зээлийн өрсөлдөөн, тоглоомын студиудын ирээдүй болон цаашид гарах шинэ төслүүдийн хувь заяанд шууд нөлөөлөх гэнэтийн эргэлт болох юм.