Б.БИЛЭГСАЙХАН
Японы төвийн бүсэд үргэлжилж буй хүчтэй аадар борооны улмаас үер, хөрсний нуралт зэрэг гамшигт үзэгдэл гарч, одоогоор таван хүн амиа алджээ.
Гамшигт хамгийн их өртсөн Чиба мужийн эрх баригчдын мэдээлснээр, мөн нэг хүн сураггүй болоод байна. Чиба болон хөрш Ибараки мужийн зарим хэсэгт 120 мянга орчим иргэнд нүүлгэн шилжүүлэх сэрэмжлүүлэг хүчинтэй хэвээр байгаа аж.
Аадар борооны улмаас төмөр замын хөдөлгөөнд саатал үүсэж, Нарита олон улсын нисэх онгоцны буудлыг нийслэлтэй холбосон тээврийн үйлчилгээнд мөн доголдол гарсан байна. Үүний улмаас нисэх буудалд 7000 орчим хүн саатжээ.
Японы төвийн бүсийн зарим газарт 24 цагийн хугацаанд 360 миллиметрээс давсан хур тунадас орсон байна. Мөн цахилгаан дамжуулах шугам гэмтсэний улмаас Чиба мужид 25 мянга гаруй айл өрх цахилгаангүй болжээ.
|
Гадаад
