Б.БИЛЭГСАЙХАН
БНСУ-д COVID-19-ийн халдвар дахин нэмэгдэх шинж тэмдэг ажиглагдаж эхэлсэнтэй холбоотойгоор эмийн сангаас гадна дэлгүүрүүдээр маск, COVID-19-ийн өөрөө хийх түргэвчилсэн тест болон ханиадны эмийн борлуулалт эрс нэмэгджээ.
БНСУ-ын Өвчний хяналт, урьдчилан сэргийлэх агентлагийн мэдээлснээр наймдугаар сарын хоёр дахь долоо хоногт COVID-19-ийн вирус илрүүлэх шинжилгээний эерэг үзүүлэлт 9.1 хувь хүрсэн байна. Энэ нь гурван долоо хоногийн өмнөхөөс ойролцоогоор 2.8 дахин өндөр үзүүлэлт юм.
Мөн COVID-19-ийн улмаас эмнэлэгт хэвтэн эмчлүүлж буй өвчтөнүүдийн тоо сүүлийн нэг сарын хугацаанд 2.4 дахин нэмэгджээ.
Халдвар нэмэгдсэнтэй зэрэгцэн Солонгосын томоохон сүлжээ дэлгүүрүүдэд COVID-19-тэй холбоотой бүтээгдэхүүний борлуулалт энэ сард мэдэгдэхүйц өссөн байна.
GS25 дэлгүүрүүдэд наймдугаар сарын 1-нээс 27-ныг хүртэл COVID-19-ийн өөрөө хийх тестийн борлуулалт өмнөх сарын ижил үеийнхээс 50.3 хувиар өсжээ. Маскны борлуулалт 10.3 хувь, ханиадны эмийн борлуулалт 8.8 хувиар нэмэгдсэн байна.
Харин нярай болон хүүхдийн маскны борлуулалт 204.4 хувиар өссөн нь хамгийн өндөр үзүүлэлт болжээ. Улирал солигдож, шинэ хичээлийн улирал эхэлсэнтэй холбоотойгоор хүүхэдтэй гэр бүлүүдийн эрэлт нэмэгдсэн гэж үзэж байна.
7-Eleven-д COVID-19-ийн тестийн борлуулалт 93 хувиар, маскны борлуулалт 17 хувиар, ханиадны эмийн борлуулалт 19 хувиар өсжээ.
CU дэлгүүрүүдэд мөн COVID-19-ийн тестийн борлуулалт 45.7 хувиар, ханиадны эмийн борлуулалт 12.2 хувиар нэмэгдсэн байна.
Мэргэжилтнүүдийн үзэж байгаагаар халдварын тархалт үргэлжилбэл, ялангуяа шинэ хичээлийн улирал эхэлж байгаатай холбоотойгоор хүүхэд, өсвөр насныхны дунд маск болон жоргүй эмийн эрэлт цаашид нэмэгдэх боломжтой байна.
Гэхдээ дээрх тоон үзүүлэлтүүд нь COVID-19 дахин хүчтэй дэгдэлт болсныг дангаараа батлахгүй бөгөөд халдварын нөхцөл байдлыг цаашид ажиглах шаардлагатай юм.
|
Гадаад
