ТАТАР МАЙДАР
Энэхүү мэдэгдлийг Хятадын тагнуулын дарга Чэнь Исинь хийсэн юм.
Хятадын тагнуулын дарга Чэнь Исинь хиймэл оюун ухааны технологийн талаар хийсэн дараах гол мэдэгдлүүдийг Zogii.mn хүргэж байна.
Хиймэл оюун ухаан нь том гүрнүүдийн хоорондох стратегийн өрсөлдөөний шинэ талбар болоод байна. Энэ технологи нь улс орнуудын үзэл суртлын аюулгүй байдалд системтэй нөлөө үзүүлж болзошгүй бөгөөд дайсагнагч хүчнүүд үүнийг ашиглан хуурамч цуу яриа тараах, хортой мэдээллийг олноор үйлдвэрлэх эрсдэлтэйг тэрбээр анхааруулав.
Мөн хиймэл оюун ухаан нь мэдээллийн чухал дэд бүтцүүдэд ноцтой аюул учруулж байгааг тэрээр дурдаад АНУ-д боловсруулсан дараагийн үеийн загварууд болох "Claude Mythos" болон "GPT-5.5-Cyber" зэрэг нь кибер халдлага үйлдэх техникийн босго болон зардлыг үлэмж хэмжээгээр бууруулж байгааг дурдлаа. Гадаадын тагнуулын албад мэдээлэл цуглуулагч ухаалаг роботууд болон өгөгдөл олборлох технологийг ашиглан улсын чухал өгөгдөл, арилжааны нууц, хувь хүний мэдээлэл зэрэг эмзэг мэдээллүүдийг идэвхтэй цуглуулж байна гэж тэрбээр тэмдэглэжээ.
Чэнь Исинь хэрэглэгчид гадаадын хиймэл оюун ухааны хэрэгслүүдийг ашиглан нууц мэдээллийг болгоомжгүй боловсруулснаас үүдэн улсын дотоод өгөгдөл олноор алдагдахаас сэрэмжлүүлэв. Жишээлбэл, олон нийтэд нээлттэй байдаг "OpenClaw" зэрэг хиймэл оюун ухааны агентууд нь төхөөрөмжийг алсаас удирдах болон чухал мэдээлэл алдагдахад хүргэж болзошгүй эмзэг талуудтай байдаг аж.
Түүнчлэн тэрбээр хиймэл оюун ухааны салбар дахь монополоос үүдэлтэй технологийн ялгаа газар авч байгааг анхааруулаад, давамгайлж буй технологийн гүрнүүд тусгай жагсаалт гаргах, технологийн хяналт тогтоох, салбарын стандартыг монополчлох, хаалттай экосистем үүсгэх замаар дэлхийн нийлүүлэлтийн сүлжээг тасалдуулж байна гэж буруутгав.
Хэдийгээр Чэнь тодорхой улс орны нэрийг дурдаагүй ч түүний хэлсэн үг АНУ болон Хятад улсын хоорондох өргөн хүрээний өрсөлдөөнийг илтгэж байна.
Вашингтоны зүгээс хиймэл оюун ухааны хөгжлөөр Хятад улсыг өөрийнхөө урдуур оруулахыг зөвшөөрөхгүй гэдгээ ил тод мэдэгдсээр ирсэн юм. АНУ-ын Сангийн сайд Скотт Бессент өмнө нь хэрэв АНУ энэхүү уралдаанд Хятадад ялагдвал өөр юу ч ач холбогдолгүй болно гэж анхааруулж байв. Энэхүү технологийн дайны хүрээнд АНУ Хятадын хиймэл оюун ухааны салбарт чип нийлүүлэлт, хөрөнгө оруулалт, зах зээлийн хязгаарлалт, боловсон хүчин солилцоо зэрэг хэд хэдэн чиглэлээр хориг арга хэмжээ аваад байгаа юм.
Чэнь мөн гадаад орнууд хиймэл оюун ухааныг тагнуул хийх, улсын нууц хулгайлах, хуурамч мэдээлэл тараах болон Хятад улсыг стратегийн хувьд тогтоон барихад ашиглах гэсэн оролдлогуудыг илчлэхийн тулд урьдчилан сэргийлэх механизмыг бэхжүүлж, олон нийтэд анхааруулга хүргэж байхыг уриаллаа.
Дэлхий нийт гегемонизм, технологийн барьцаалалт, хаалттай бүлэглэлүүдийн эсрэг тууштай зогсож, хиймэл оюун ухааны салбарт шударга бөгөөд нээлттэй олон улсын дүрмийн системийг бий болгох ёстой гэж тэрбээр бичжээ.
|
Гадаад
