Европын Комиссын дарга Урсула фон дер Ляйен "ЕХ-ны өнөөгийн байдал" (SOTEU) илтгэлдээ Европын батлан хамгаалах салбарт түүхэн шинэчлэл хийхээ зарлаж, энэ нь Украин улстай стратегийн түншлэлээ гүнзгийрүүлэх болон НАТО-гийн хамтын ажиллагааг шинэ шатанд гаргахад чиглэсэн болохыг онцлов.

Европын нутаг дэвсгэрт Оросын талаас ирэх гибрид халдлага, дроны өдөн хатгалга нэмэгдэж буй энэ үед ЕХ аюулгүй байдлаа бие даан хамгаалах цаг болсныг тэрээр сануулсан байна. Санаачилгын хүрээнд Украины оролцоо болон НАТО-той тогтоох харилцааг дараах байдлаар тодорхойллоо:

• Украин улс Европын аюулгүй байдлын цөм болох нь: Шинээр байгуулагдах "Европын аюулгүй байдлын зөвлөл"-ийн дээд хэмжээний форматад ЕХ-ны гишүүн бус орнуудаас Украиныг хамгийн түрүүнд татан оролцуулна. Ингэснээр ЕХ Украины батлан хамгаалах чадамжийг өөрийн системтэй шууд уялдуулах юм.

• Пуужингаас хамгаалах хамтарсан систем: ЕХ-ны зүгээс Украины агаарын хамгаалалтыг бэхжүүлэх амлалт өгөхийн зэрэгцээ ганц ханган нийлүүлэгчээс хараат байдлыг халах зорилгоор Украинтай хамтран модульчлагдсан, хямд өртөгтэй агаарын довтолгооноос хамгаалах шинэ системийг хамтран хөгжүүлнэ.

• НАТО-гийн 4 дүгээр заалтын Европын хувилбар: ЕХ нь НАТО-гийн гэрээний 4 дүгээр заалттай ижил түвшний "Аюулгүй байдлын яаралтай тусламжийн протокол"-ыг нэвтрүүлнэ. Энэ нь зэвсэгт мөргөлдөөний хэмжээнд хүрэхгүй ч гишүүн орнуудын тогтвортой байдалд заналхийлсэн гибрид халдлагын үед ЕХ-ны орнууд нэгдсэн хариу арга хэмжээг шуурхай зохицуулах боломжийг олгоно.

• НАТО-той бүрэн уялдах тухай: Урсула фон дер Ляйен шинээр зарласан "Стратегид дэмжлэг үзүүлэх Европын хэрэгсэл" (European Instrument for Strategic Enablers) хөтөлбөр нь НАТО-гийн үйл ажиллагаатай бүрэн нийцэж, түүнийг сулруулах бус, харин Европ дахь хүчин чадлыг нь нэмэгдүүлж хүчирхэгжүүлнэ гэдгийг хатуу мэдэгдэв.

Урсула фон дер Ляйен "Украинчууд өөрийн улсын оршин тогтнол, эрх чөлөөний төлөө тэмцэж байна. Тэдний эрх чөлөө бол Европын эрх чөлөө мөн" гээд, ирж буй өвлийн хүнд цаг үед Украинд үзүүлэх хүмүүнлэгийн болон эрчим хүчний тусламжийг хамгийн дээд түвшинд хүргэхээ илэрхийллээ.