Франц улсад ахлах сургууль болон их сургуулийн сурагч, оюутнуудыг хамарсан эсэргүүцлийн жагсаал хүчтэй өрнөж, нөхцөл байдал хурцадсаны улмаас тус улсын Ерөнхий сайд Себастьян Лекорню яаралтай хямралын уулзалт зарлалаа. Жагсаал улам бүр газар авч, зарим бүс нутагт эмх замбараагүй байдал үүссэн тул Ерөнхий сайд холбогдох сайд нарын албан томилолтуудыг цуцалж, энэхүү асуудалд бүх анхаарлаа хандуулахыг үүрэгдээд байна.

Энэхүү олныг хамарсан эсэргүүцэл Францын боловсролын систем дэх олон жилийн бухимдлаас үүдэлтэй юм. Жагсагч залуус сургуулиудын санхүүжилт болон материаллаг бааз хангалтгүй, багш нарын хүрэлцээ муу байгааг шүүмжилж байна. Мөн тэд ахлах сургуулийн хичээлийн цаг хэт урт буюу өглөөний 08:00 цагаас оройн 18:00 цаг хүртэл үргэлжилдэг нь залуусын сэтгэцэд сөрөг нөлөө үзүүлдэг хэмээн бухимдаж байгаа юм. Үүнээс гадна их сургуульд элсэн орох өргөдөл гаргах одоогийн систем нь хэт хүнд сурталтай, сурагчдын дуу хоолойг сонсдоггүй хэмээн залуус үзэж байна.

Нөхцөл байдал хүндэрч, зарим сургуулийг галдан шатаах, ажилчид руу бензин цацах зэрэг халдлага гарсан тул Боловсролын сайд Эдуард Жеффрей эрсдэлтэй бүсүүдийн хичээлийг цахимаар орох зааварчилгааг өгчээ. Түүнчлэн, Дотоод хэргийн сайд цагдаа нарт хандан сургуулийн үйл ажиллагааг боогдуулсан хаалтуудыг чөлөөлж, вандализмтай тууштай тэмцэхийг тушаасан байна.

Энэхүү үйл явдал нь ирэх оны тавдугаар сард болох Францын Ерөнхийлөгчийн сонгуулийн кампанит ажлын гол сэдэв болон хувирлаа. Одоогийн Ерөнхийлөгч Эммануэль Макрон үндсэн хуулийн дагуу гурав дахь удаагаа нэр дэвших эрхгүй бөгөөд түүний халааг авах сурталчилгаа ид өрнөж буй энэ үед уг жагсаалт засгийн газарт том дарамт болж байна. Зүүн жигүүрийн нэр дэвшигч Жан-Люк Меланшон засгийн газрын авч хэрэгжүүлж буй арга хэмжээг хэтэрхий хатуу байна хэмээн шүүмжилж байгаа бол шүүмжлэгчид түүний намыг залуусыг турхирч, улс төрийн оноо авах гэж байна хэмээн буруутгаж байгаа юм.

Үүнээс гадна, Франц улс санхүүгийн хүндрэлтэй тулгарч, 2027 оны төсвийн таналтыг дөнгөж танилцуулаад байсан үетэй энэхүү жагсаал давхацсан нь байдлыг улам бүр ээдрээтэй болгож байна.