АНУ-ын Холбооны мөрдөх товчоо Калифорни мужийн 34 настай Ваньин Хизер Жанг Тайванийн Ерөнхийлөгч Лай Чин-тэгийн хүүг мөрдөн тагнасан, БНХАУ-ын бүртгэлгүй төлөөлөгчөөр ажилласан байж болзошгүй хэргээр баривчилжээ.

Үл хөдлөх хөрөнгийн зуучлагчаар ажилладаг Жанг ням гарагт Шанхай руу нисэхээр онгоцонд суух гэж байх үед нь нисэх буудлаас саатуулсан байна. Холбооны мөрдөн шалгах байгууллагын мэдээлснээр, тэрбээр Хятадын албан тушаалтнуудын чиглэлээр Тайванийн Ерөнхийлөгчийн ойрын хамаатны талаар мэдээлэл цуглуулж байжээ.

Мөрдөн шалгах баримтад дурдсанаар, Жанг Сиэтл хотод ажилладаг Лай Чин-тэгийн 30 настай хүү Тин-Ю Лайг мөрдөж, түүний гэр, автомашины дугаар болон ойрын хүмүүсийн талаар зураг, дүрс бичлэг цуглуулан Хятадын талын хүмүүст дамжуулсан гэх үндэслэл байгаа аж. Тэрбээр WeChat-аар Хятадын төрийн албан тушаалтнууд байж болзошгүй хоёр хүнтэй харилцаж байсан гэж мөрдөгчид үзжээ.

Хяналтын камерын бичлэгт Жанг өөр нэг хүний хамт автомашинд сууж, Лайн гэр болон ойр орчмын зургийг авч буй дүрс үлдсэн байна. Мөн түүний нөхөр 2023 онд Сиэтлд очиж, ижил төрлийн тандалт хийсэн байж болзошгүй гэж мэдээлжээ.

АНУ-ын прокурорын байгууллагын мэдээлснээр, Жанг гадаад улсын нэрийн өмнөөс үйл ажиллагаа явуулж байгаагаа АНУ-ын холбогдох байгууллагад бүртгүүлээгүй нь холбооны хууль зөрчсөн байж болзошгүй юм. Тэрбээр Лос-Анжелесийн холбооны шүүхэд очиж, хэрэгтэй холбоотой анхан шатны шүүх ажиллагаанд оролцох юм.