АНУ-ын Ерөнхийлөгч Дональд Трамп Цагаан ордны Хэвлэлийн нарийн бичгийн шинэ даргаар консерватив чиглэлийн тайлбарлагч, хуульч Кэти Захариаг (Katie Zacharia) томилжээ. Тэрээр 2026 оны 8 дугаар сард албан тушаалаа хүлээлгэж өгсөн Каролин Ливитт (Karoline Leavitt)-ийн халааг авч байгаа юм.

Ерөнхийлөгч Трамп баасан гарагт өөрийн "Truth Social" платформдоо энэхүү томилгоог зарлахдаа, Кэти Захариагийн хэвлэл мэдээллийн салбар, Америкийн олон нийт болон засаг захиргааны дунд эзлэх нэр хүндийг өндрөөр үнэлж, түүнийг маш сайн ажиллаж чадна гэдэгт итгэлтэй байгаагаа илэрхийлжээ.

Шинээр томилогдсон Хэвлэлийн нарийн бичгийн даргын тухай товч баримтууд:

• Өмнөх албан тушаал: "Truth Social" платформыг ажиллуулдаг "Trump Media & Technology Group"-ийн харилцаа холбооны ахлах зөвлөхөөр ажиллаж байсан.

• Төрийн албаны туршлага: 2026 оны 2-оос 3 дугаар сарын хооронд АНУ-ын Дотоодын аюулгүй байдлын яаманд хэвлэлийн төлөөлөгчөөр богино хугацаанд ажилласан.

• Мэргэжил, карьер: Хуульч мэргэжилтэй, Трампын ерөнхийлөгчийн сонгуулийн кампанит ажилд оролцож байснаас гадна Fox News, Newsmax зэрэг сувгуудаар улс төрийн тайлбарлагч хийдэг байсан.

Өмнөх Хэвлэлийн нарийн бичгийн дарга Каролин Ливиттийн хувьд гэр бүлдээ илүү цаг гаргах үүднээс ажлаа өгсөн бөгөөд 2026 оны 11 дүгээр сарын 1-нээс эхлэн Fox News сувагт гэрээт тоймчоор ажиллахаар болсон байна.

Тэрээр 1984 оны 3 дугаар сарын 23-нд АНУ-ын Калифорни мужид төрсөн (төрөхдөө Кэти Блэк /Katie Black/ нэртэй байсан).

Калифорни дахь Пеппердайн их сургуулийг (Pepperdine University) Улс төрийн шинжлэх ухааны бакалавр зэрэгтэй төгсөж, улмаар тус сургуулийн Карузогийн хуулийн сургуульд (Pepperdine Caruso School of Law) хуулийн ухааны доктор (J.D.) зэрэг хамгаалсан хуульч мэргэжилтэй.

Тэрээр кино продюсер Тайлер Захариа (Tyler Zacharia)-тай гэрлэсэн, дөрвөн хүүхэдтэй эмэгтэй юм.