Филиппин улсын нийслэл Манила хотоос урд зүгт байрлах Фернандо агаарын баазад ердийн сургуулилтын нислэг үйлдэж байсан цэргийн сургалтын хоёр онгоц агаарт мөргөлдсөн ноцтой осол гарлаа. Уг ослын улмаас онгоцнуудад байсан нийт дөрвөн цэргийн нисгэгч бүгд амь үрэгдсэн байна

Осол 2026 оны 10 дугаар сарын 23-ны баасан гарагийн үдээс хойш 15:51 цагт гарчээ сургуулилтад ашиглагдаж байсан SF-260 загварын нэг сэнстэй хоёр онгоц агаарт мөргөлдсөн байна. филиппиний агаарын цэргийн хүчний албан ёсны төлөөлөгч хурандаа Алвин Капингуины мэдээлснээр хоёр онгоц хоёулаа агаарын баазын цэргийн бүс дотор унасан бөгөөд нисгэгчдээс гадна өөр хүн бэртэж гэмтээгүй амь үрэгдээгүй гэлээ.

Филиппиний зэвсэгт хүчнээс мөргөлдөөн болсон шалтгааныг тогтоохоор албан ёсны мөрдөн байцаалтын ажиллагааг эхлүүлсэн бөгөөд шалгалтын ажил дуустал SF-260 загварын бүх онгоцны нислэгийг түр хугацаагаар зогсоолоо. Мөн амь үрэгдсэн нисгэгчдийн гэр бүлд тусламж дэмжлэг үзүүлэх ажлыг зохион байгуулж байна.

Энэхүү SF-260 загварын сургалтын онгоц урьд нь хэд хэдэн удаа осолдож байсан бөгөөд хамгийн сүүлд энэ оны 5 дугаар сард Филиппиний хойд хэсгийн уулархаг бүсэд осолдож хоёр нисгэгч амь үрэгдэж байжээ.