Хөнжилдөө орсон намууд хөлөө жийлцэж, УИХ-ын чуулган АН-ын гишүүдийн онгорхой сандалтай үргэлжилж байна. МАН, АН хоёр Засгийн газрын зааланд бол хүнтэй нийлээд озолдон сексдэж байгаа бол УИХ-ын танхимд бол зодолдон боксдож байна. 

УИХ-ын гишүүн Жудагийн Баярмаа асууж, Ерөнхий сайд С.Баярцогтод хариултаа өгсөн нь хайр дурлалгүйгээр хамтран амьдрах хугацаатайг сануулж, гал дээр тос нэмлээ. 

АН-ынхан Ж.Баярмаа бол С.Баярцогт биш, эрэгтэй биш эмэгтэй хүн, УИХ-ын гишүүн асуух эрхтэй, хувь хүний гомдол тунирхал биш, Засгийн газар парламентынхаа дээр гарсан хүчирхийлэл гэх зэргээр үзэж байна.  

МАН-ынхан С.Баярцогт баруун аймгийн Ж.Баярмаа болчихсон явж байна, 50 гарсан эмэгтэйг залуу хүн байжийж гэсэн нь матаас биш магтаал, топ модель Одгэрэлтэй зүйрлэсэн гоё үг гэцгээж байна.

АН-ынхан энэ бол эрэгтэй, эмэгтэй хоёр хүний хэрүүл биш, институц хоорондын асуудал учир “Бид явлаа, баяртай, битгий араас дуудаарай” гэдэг дууг караокед бэлтгэж байгаа мэдээтэй байна. АН-ын дарга тэргүүтэй МАН-ын Засгийн газарт ажилтай 8 хүн наашаа ч гүй цаашаа ч үгүй, ийшээ харж инээгээд, тийшээ харж уйлаад хэцүүхэн байна.

МАН-ынхан өрөөнд нь цэцэг бариад орж уучлал гуйхгүй, Ж.Баярмаагийн төрсөн ах нь бүр ХЗХ-той байсан юм шүү гэж бүх юмны эсрэг супер тэмцэгчээр төрийн ордны хашааны үүдэнд хэлүүлж байна. 

Ж.Баярмаа нь цаанаа С.Баярцогт, Оюук нь жинхнээсээ Женко шүү гэж ч байх шиг. Өөр хүнээс өөр хүн олж хардаг трэнд дэлгэрч, өөрийгөө Ерөнхий сайд гэж бодсон засуул Э.Оюунболдыг Б.Орхонбаяр аа ч гэж байх шиг. Орхонбаяр арслан чинь энэ ш дээ гээд Орхон гавъяатын зургийг ч үзүүлээд байх шиг. 

АН, МАН хоёр аль нь илүү гомдсон бэ гэдэг ана мана уралдаан, Ж.Баярмаа, Ерөнхий сайд хоёрын ач тач тунирхал дунд ард түмэн л хохирч байна. МАН, АН хоёр МАНАН дундаа тэврэлдэж, МАНХАН босгож тэрсэлдээд л, дурлалгүй гэрлэлт, сэтгэлгүй амьдрал ганцхан үгэн дээр салж сарнидаг шиг л юм болоод байна.