Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд говийн бүсийн дөрвөн аймаг — Өмнөговь, Дундговь, Говьсүмбэр, Дорноговь — нэгдэн, эх дэлхийгээ ногооруулж, цөлжилттэй тэмцэх их аянд идэвхтэй оролцож байна.

Өнөөдрийн байдлаар дээрх аймгууд нийт 3.4 сая модыг аль хэдийн тариад буй бөгөөд энэ нь “Тэрбум мод” хөдөлгөөний хүрээнд ургаж буй нийт модны тавны нэгийг говийн хөрсөнд суулгасныг илтгэж байна. Өөрөөр хэлбэл, тус бүс нутгийн хувь нэмэр нь үндэсний хөдөлгөөнд жин дарж байгаа юм.

Говийн дөрвөн аймаг 2030 он хүртэл нийт 200 сая мод тарих зорилт тавин ажиллаж байна. Аймаг тус бүрийн төлөвлөгөө дараах байдлаар байна:

• Говьсүмбэр аймаг – 5,500,000 мод

• Дорноговь аймаг – 72,913,562 мод

• Дундговь аймаг – 75,806,200 мод

• Өмнөговь аймаг – 45,000,000 мод

Энэ нь зөвхөн тооны хөөцөлдөөн бус, байгаль орчныг хамгаалж, ус, хөрс, агаарын чанарыг сайжруулах үндэсний хэмжээний бодлогын дор хэрэгжиж буй томоохон алхам юм. Түүнчлэн тухайн бүсийн газар зүйн онцлогт тохирсон мод ургуулах судалгаа, хөрсний бэлтгэл, усалгааны системийн шийдлүүд зэрэг олон асуудлыг цогцоор нь шийдвэрлэх шаардлагатай тул ажлын цар хүрээ асар том байна.

Ийнхүү говь нутагт “ногоон ирээдүй” ургаж эхэллээ. Энэ бол зөвхөн байгальд бус, ирээдүй үед маань өвлүүлэх үнэт өв юм.