Монголын Математикийн 58 дугаар олимпиадын хоёрын даваа, Монгол Улсын гавьяат багш С.Цагааны нэрэмжит Нийслэлийн математикийн XXVI олимпиад зохион байгуулагдаж, 9 дүүргээс шалгарсан төрийн болон төрийн бус өмчийн 34 сургуулийн нийт 400 сурагч, дунд ангийн 51 багш оролцлоо. 

Олимпиадыг Монголын математикийн олимпиадын хороо болон нийслэлийн Боловсролын газраас баталсан удирдамжийн дагуу Дунд 1 /6-8 дугаар анги/, Дунд 2 /9-10 дугаар анги/, Ахлах /11-12 дугаар анги/, Багш гэсэн 4 ангилалаар зохион байгуулж, засалтын комиссыг МУИС-ийн багш, доктор Ү.Отгонбаяр, Т.Хулан, Б.Баяржаргал, У.Батзориг нар ахлан ажиллав. 

Багийн дүнгээр: Нийслэлийн ерөнхий боловсролын 11 дүгээр сургууль 4 алт, 2 мөнгө, 3 хүрэл, нийслэлийн ерөнхий боловсролын 1 дүгээр сургууль 1 алт, 2 мөнгө, 3 хүрэл, “Сант” сургууль 4 мөнгө, 11 хүрэл, “Орчлон” сургууль 1 алт, 1 мөнгө, 1 хүрэл, “Олонлог төв” сургууль 1 алт, “Олонлог академи” сургууль 1 алт, “Эрхэт эрдэм” сургууль 1 алт, 1 мөнгө, 2 хүрэл,  “Шинэ үе” сургууль 1 хүрэл, “Шинэ эрин” сургууль 1 хүрэл, “Хобби” сургууль 1 хүрэл медаль тус тус хүртлээ.

Шагнал гардуулах ёслолын үйл ажиллагаанд нийслэлийн Боловсролын газрын Математикийн боловсролын багшийн хөгжил хариуцсан мэргэжилтэн Н.Болдбаатар, ММОХ-ны гүйцэтгэх захирал Б.Батбаясгалан нар оролцож,  удахгүй болох Улсын Математикийн олимпиадад амжилт хүсээд, олимпиадын зохион байгуулалтыг хангаж ажилласан нийслэлийн ерөнхий боловсролын 1 дүгээр сургуулийн математикийн Заах аргын нэгдлийн хамт олон болон ивээн тэтгэсэн Монгол Улсын гавьяат багш С.Цагааны гэр бүлд талархал илэрхийллээ.