Хөвсгөл аймгийн Рэнчинлхүмбэ сумын Хоолойн зах багийн “Чулуут-Уул” гэдэг газар /аймгийн төвөөс хойд зүгт 340 км, сумын төвөөс хойд зүгт 70 км, Цагааннуур сумаас хойд зүгт 40 км-т/ ойн түймэр гарсан тухай дуудлагыг 9 сарын 9-ний өдрийн 08:25 цагт хүлээн авсан. Хөвсгөл аймгийн Онцгой байдлын газрын Гал түймэр унтраах, аврах 27 дугаар анги, Алаг-Эрдэнэ сумын Хатгал тосгон дахь Гал түймэр унтраах, аврах 69 дүгээр ангийн алба хаагчид, Рэнчинлхүмбэ, Цагааннуур сумын мэргэжлийн ангийн алба хаагчид 2 бүлэгт хуваагдан ажиллаж 9 сарын 11-ний өдрийн 17:00 цагт цурамд оруулсан. 9 сарын 12-ны өдөр “Чулуут-Уул”-ын хойд талаар 4.8 км-ын урттай хамгаалалтын зурвас татсан. Түймэрт урьдчилсан байдлаар 12 га ойн талбай шатсан байна.

Мөн Хөвсгөл аймгийн Цагааннуур сумын Хармай багийн “Моорог-Уул” гэдэг газар /аймгийн төвөөс хойд зүгт 320 км, сумын төвөөс зүүн хойд зүгт 45 км-т/ ойн түймэр гарсан тухай дуудлагыг 9 сарын 12-ны өдрийн 20:47 цагт хүлээн авсан. Ренчинлхүмбэ сумын “Чулуут-Уул”-ын түймэр дээр ажиллаж байсан Цагааннуур сумын Засаг даргын Тамгын газрын даргаар ахлуулсан хүмүүс 9 сарын 12-ны өдрийн 19:00 цагт “Моорог-Уул”-ын чиглэлд явсан.