Европын зөвлөл ОХУ-ын эсрэг авах хориг арга хэмжээний ес дэх багцыг зөвшилцжээ.

Тодруулбал, ОХУ-ын НТВ/НТВ Мир, Россия-1, РЕН-ТВ, Первый канал сувгуудын Европт нэвтрүүлэн явуулах зөвшөөрлийг түдгэлзүүлэх ажлыг ЕХ санаачилсан.  "Эдгээр хэвлэл мэдээллийн хэрэгсэл нь ОХУ-ын удирдлагын байнгын шууд болон шууд бус хяналтанд байдаг бөгөөд хуурамч мэдээлэл, цэргийн суртал ухуулга, Оросын түрэмгийллийг хууль ёсны болгож, Украинд үзүүлэх дэмжлэгийг сулруулж, нэгдсэн үйл ажиллагаандаа ашигладаг" гэж Европын холбооны зөвлөл тайлбарлажээ.

Үүнээс гадна Бүх Оросын Бүсийн хөгжлийн банктай үйл ажиллагаа явуулахыг бүрэн хориглож, дахин Оросын хоёр банкны хөрөнгийг битүүмжлэх арга хэмжээ авч байна.  Мөн Европын холбооны иргэд ОХУ-ын төрийн өмчит болон төрийн мэдлийн компаниудад удирдах албан тушаал хашихыг хориглосон байна.

Шинэ хориг арга хэмжээний хүрээнд электрон бараа, мэдээллийн технологийн тоног төхөөрөмж, химийн бодис, дрон, шөнийн харааны төхөөрөмж, радио навигацийн төхөөрөмж зэрэг хосолмол хэрэглээний бараа, технологийг ОХУ-д экспортлохыг хориглох хоригийг өргөжүүлж байна.

ОХУ-ын батлан ​​хамгаалах салбартай хамаарал бүхий Оросын 168 компани, аж ахуйн нэгж хориг арга хэмжээний жагсаалтад багтжээ. 

Мөн ЕХ-нд бүртгэлтэй компаниуд Орост сурталчилгаа, зах зээлийн судалгаа, олон нийтийн санал асуулга, бүтээгдэхүүний туршилтын үйлчилгээ үзүүлэхийг хориглосон. Үүнээс гадна ОХУ-ын эрчим хүч, уул уурхайн салбарт шинээр хөрөнгө оруулалт хийхийг хориглосон байна.

Удаан хугацааны хэлэлцээний дараа Европын холбооны орнууд Оросын бордоог тус холбооны боомтоор экспортлоход тавьсан хязгаарлалтыг хөнгөвчлөх асуудлаар санал зөрөлдсөнөө даван туулж чадсан байна. Үүнээс гадна Европын холбооны удирдагчид Киевт 18 тэрбум еврогийн тусламж олгохоор эцэслэн тохиролцсон байна. Брюссельд болсон уулзалтаараа ЕХ-ны удирдагчид мөн Босни Герцеговин улсад ЕХ-ны гишүүнчлэлд нэр дэвшигчийн статус олгохоор болж, Ираны хүний ​​эрхийг зөрчиж байгааг буруушааж, Хорват Шенгений бүсэд элсэж буйг сайшаасан байна.

Эх сурвалж: Настоящее время