Сүхбаатар дүүргийн эрүүгийн хэргийн анхан шатны шүүхэд иргэн Д.Мөнх-Эрдэнэ нарын таван хүнд холбогдох эрүүгийн хэргийн шүүх хурал энэ сарын 4-нд эхэлсэн. Шүүх хурал өнөөдөр гурав дахь өдрөө үргэлжилж шийдвэрээ гаргасан. 

Анхан шатны шүүхээс Д.Мөнх-Эрдэнэд 3 жил 10 сар хорих ял оногдуулж, нээлттэй ангид эдлүүлэх шийдвэр гаргасан байна. Тодруулбал, Д.Мөнх-Эрдэнийг нийтийн албанд ажиллах эрхийг 5 жил хасаж, нээлттэй хорих ангид 3 жил 10 сар хорих, 3.7 сая төгрөгөөр торгох ялаар шийтгэлээ.

Үүнтэй холбоотой асуудлаар иргэн Д.Мөнх-Эрдэнийн нагац эгч Ж.Энхтуяа мэдээлэл хийлээ.

Тэрбээр “Миний дүү Хөх хотод ном дүрмийнх нь дагуу л ажиллаж ирсэн. Ажлаасаа буухаар нь хэрэгт тохдог юм байна. Миний хувьд хэлэх ч үг алга үнэхээр гомдолтой байна. Ээж аав нь 75 гарсан хүмүүс шүү дээ. Дөрвөн жил хүлээж чадахгүй шүү дээ. Монголд амьдрах  хэцүү байна. Монголд тамлалт гэдэг зүйл байдаггүй гэж боддог байсан ч харин ч Монголд үнэхээр байдаг юм байна. 90 хоногийн турш уулзуулахгүй, эцэст нь ачаад явчихдаг юм байна. Монголын хуулийг Ц. Нямдорж л мэддэг юм байна. Прокурор Г.Ганхөлөг, Шүүгч А.Отгонцэцэг та хоёр тушаал дэвшээрэй амжилт хүсье гэж хэлмээр байна” гэв.