Хэнтий аймгийн Биндэр сумын Онон багийн “Гарам” гэдэг газар /аймгийн төвөөс хойд зүгт 170 км-т, сумын төвөөс зүүн зүгт 0.5 км-т, Баян-Адарга сумын төвөөс баруун хойд зүгт 45 км-т/ Онон голын усанд суудлын автомашин живсэн тухай дуудлагыг 7 сарын 16-ны өдрийн 19:00 цагт хүлээн авсан.  Биндэр сумын Тамгын газрын Засаг даргаар ахлуулсан ажилтнууд иргэн О /43 настай, эрэгтэй/-ыг мөн өдрийн 19:30 цагт уснаас эсэн мэнд гаргаж автомашиныг үлдээсэн ба 7 сарын 17-ны өдөр тус аймгийн Онцгой байдлын газрын Баян-Адарга сум дахь Эрэн хайх, аврах салбарын алба хаагчид “Ланд крузер-80” загварын автомашиныг уснаас татан гаргасан байна.

Мөн Өвөрхангай аймгийн Хархорин сумын Нарийн хүр багийн “Бөөгийн-Овоо” гэдэг газар /аймгийн төвөөс зүүн хойд зүгт 170 км-т, сумын төвөөс хойд зүгт 20 км-т/ Орхон голын усанд суудлын автомашин суусан тухай дуудлагыг 7 сарын 17-ны өдрийн 19:45 цагт хүлээн авсан. Онцгой байдлын хэлтсийн Гал түймэр унтраах, аврах 45 дугаар ангийн алба хаагчдыг очиход иргэн С-ын “Си-Ар Би” загварын суудлын автомашин Орхон голын усанд живсэн жолооч С /43 настай, эрэгтэй, согтууруулах ундаа хэрэглэсэн/ нь автомашины бүхээг дээр гарсан байсныг эсэн мэнд гаргасан бөгөөд автомашиныг гаргах боломжгүй тул үлдээсэн байна.