АДМИН
Нийслэлийн Сонгинохайрхан дүүргийн нутаг дэвсгэрт хуучин нэршлээр 22-ын товчооны ойролцоох "МТ" шатахуун түгээх цэгийн хажуугийн төв замд энэ сарын 24-ний өдрийн 14:45 цагт шатахуунаа буулгаад явж байсан ачааны автомашины дугуй орчмоос гал гарч шатаж эхэлсэн байна.
Энэ үед БНӨСУ-д явагдаж буй НҮБ-ын энхийг сахиулах ажиллагаанд үүрэг гүйцэтгэхээр Зэвсэгт хүчний Сургалтын нэгдсэн төвд ажиллагааны өмнөх сургалт бэлтгэлд хамрагдсаны дараа уг хээрийн бэлтгэл сургуулилтаа дуусгаад буцаж явсан ахлах ахлагч Б.Монголжав таарсан ажээ.
Ахлах ахлагч Б.Монголжав нь Дорнод аймгийн Онцгой байдлын газрын харьяа Гал түймэр унтраах 52 дугаар ангийн аврагч, гал сөнөөгчөөр ажилладаг ба иргэний үүргээ биелүүлж, Нийслэлийн Гал түймэр унтраах 18 дугаар ангийн бүрэлдэхүүнийг ирэх хүртэлх хугацаанд галын тархалтыг зогсоож чаджээ.
Ийнхүү ахлах ахлагч Б.Монголжав иргэний эд хөрөнгийг шатах аюулаас хамгаалж, орчин тойронд нь учрах эрсдэлийг таслан зогсоожээ.
Хурандаа Б.ОТГОНБАЯР
|
Нийгэм
