Шүүхийн шийдвэр гүйцэтгэх ерөнхий газрын харьяа цагдан хорих 461 дүгээр ангид хоригдож байсан 21 настай эрэгтэй нас барсан хэргийн талаар өчигдөр /2024.07.24/ ар гэрийн зүгээс мэдээлэл өгсөн бол өнөөдөр /2024.07.25/ цагдаагийн байгууллагаас мэдээлэл өглөө. 

Хэргийн талаар ЦЕГ-ын Урьдчилан сэргийлэх газрын хэлтсийн дарга, цагдаагийн хошууч Г.Мөнхбаяр, Мөрдөн байцаах албаны Дэд, Дүн шинжилгээ үнэлгээ, хяналт шалгалтын хэлтсийн дарга, цагдаагийн хурандаа Б.Батдэлгэр нар мэдээлэл өгөхдөө 

Амь хохирогч О нь 2024.04.25-ны өдрөөс эхлэн цагдан хоригдож байх хугацаанд буюу 2024.07.12-ны өдрөөс хойш хэвлий хэсгээр нь өвдөлт үүсэж, нуруу өвдөж байна гэх эрүүл мэндийн шалтгааны улмаас Цагдан хорих 461 дүгээр ангийн эмнэлэгт хэвтэн эмчлүүлж байгаад 2024.07.22-ны өдөр бие муудаж улсын нэгдсэн 3 дугаар эмнэлэгт хүргэгдэн ирээд 07 дугаар сарын 23-ны өдөр "... цөсний шалтгаант нойр булчирхайн цочмог үрэвсэл, үжил, үжлийн шок, амьсгалын гачаалалт хам шинж...." зэрэг эмнэлгийн байгууллагын урьдчилсан оноштойгоор нар барсан. Үхлийн шалтгааны дахин нягтлан шалгуулах зорилгоор ШШЕГ-аас шинжээч эмч томилуулан мөрдөн шалгах ажиллагааг үргэлжлүүлэн явуулж байна" гэсэн бол ар гэрийн зүгээс тухайн асуудалд цагдаагийн алба хаагчдыг буруутгаж байгаа юм. 

Уг хэрэгтэй холбогдуулан ЦЕГ-ын дарга, бригадын генерал Т.Сүхболдод хариуцлага тооцох асуудлыг цахим орчинд иргэд хөндсөөр байна. Тухайн асуудлаар УИХ-ын гишүүн асан, Ардчилсан Намын хуульч О.Баасанхүү Цагдаагийн Ерөнхий Газрын даргаар ажиллахад бэлэн хэмээн жиргэжээ. 

Тэрбээр: "27 жил хуулийн салбарт байж өмгөөлөл хийлээ. 8 жил хууль тогтоогч байлаа. Цагдаагийн тухай хуулиа өөрчлөөд хуульч хүн ЦЕГ-ыг удирдаж болно гэвэл би ажиллахад бэлэн байна. Цагдааг иргэншүүлэх хэрэгтэй" гэжээ.