АДМИН
Өнгөрсөн 1 хоногийн /2025.09.06-ны 08 цагаас 09.07-ны 08 цаг хүртлэх/ цаг агаарын тойм мэдээг танилцуулж байна.
Хур тунадас: Өнгөрсөн хоногт төвийн аймгуудын нутгийн хойд болон зүүн, говийн аймгуудын нутгийн хойд хэсэг, зүүн аймгуудын нутгийн зарим газраар 0.0-14.0 мм бороо, дуу цахилгаантай аадар бороо орсон байна. Үүнээс хоногийн нийлбэрээр хамгийн их нь Нийслэлийн Өлзийтөд 14.0 мм, Буянт-Ухаад 8.0 мм, Багануурт 7.0 мм, Төв аймгийн Алтанбулагт 13.0 мм, Зуунмодод 10.0 мм, Заамарт 7.0 мм, бусад нутгаар 0.0-6.0 мм бороо орсон байна.
Агаарын хамгийн их температур: Өчигдөр өдөр Хангай Хөвсгөл, Хэнтийн уулархаг нутаг, Завхан, Заг-Байдраг голын эх, Идэр, Тэс, Туул, Тэрэлж голын хөндийгөөр +7…+13 градус, Их нууруудын хотгор, говийн бүс нутгийн өмнөд хэсэг, Дорнод-Дарьгангын тал нутаг, Халх голын сав газраар +20…+27 градус, бусад нутгаар +13…+19 градус дулаан байв.
Агаарын хамгийн бага температур: Өнгөрсөн шөнө Алтай, Хангай, Хөвсгөлийн уулархаг нутаг, Завхан, Заг-Байдраг голын эх, Идэр, Тэс голын хөндийгөөр -1…-8 градус, Их нууруудын хотгор, говийн бүс нутгийн өмнөд хэсэг, Дорнодын тал нутгаар +6…+11 градус, бусад нутгаар 0...+5 градус дулаан хоносон байна.
Салхи: Өнгөрсөн хоногт нутгийн баруун хэсгээр секундэд 4-9 метр, нутгийн зүүн хэсгээр секундэд 7-12 метр, зарим үед секундэд 15-17 метр хүрч ширүүссэн байна.
Улаанбаатар хот орчмоор: Өчигдөр өдөр 2.0-14.0 мм бороо орж, өнгөрсөн шөнө бороо ороогүй байна. Салхи өдөртөө баруун хойноос секундэд 4-9 метр. Агаарын температур өчигдөр өдөр +12…+14 градус, өнгөрсөн шөнө +5 градус дулаан хоносон байна.
|
Эх сурвалж
| ЦУОШГ
|
Нийгэм
