С.ОТГОНБАЯР
Хөвсгөл аймгийн Тариалан сумд 2025 оны есдүгээр сарын 17-нд сураггүй алга болсон хоёр настай хүү ес хоногийн дараа нас барсан байдалтай олдсон харамсалтай хэрэг гарсан. Хүүгийн цогцос анх алга болсон байршлаас 9 км зайтай газраас олдсон байдаг. Урьдчилсан байдлаар хүүгийн цогцос бүрэн бүтэн байсан гэх мэдээллийг цагдаагийн байгууллагаас өгөөд байсан.
Тэгвэл шүүх эмнэлгийн дүгнэлт уржигдар буюу аравдугаар сарын 14-ний өдөр гарч, хүүг "Гаднын нөлөөгүй, харангадаж нас барсан" гэх дүгнэлт гарчээ.
Эргэн сануулахад, 2025 оны есдүгээр сарын 17-ны өдрийн 16:55 цагт Хөвсгөл аймгийн Тариалан сумын Баянхошуу багийн “Сайхан мод” гэдэг газарт бага насны хүүхэд сураггүй болсон тухай дуудлага Онцгой байдлын газарт ирсэн. Иргэн Ц-ийн хоёр настай хүү П нь мод бэлтгэлийн газарт гэр бүлийнхээ хамт байсан бөгөөд эцэг эхийнхээ түр холдсон хугацаанд машиндаа унтаж байгаад сураггүй болсон байдаг. Хүүг давхардсан тоогоор 2100 гаруй хүнтэй эрлийн баг, 10 эрэлч нохой, 4 төрлийн дроноор хайсан байдаг.
|
Нийгэм
