Б.АМАРТҮВШИН
Өвлийн улиралд малын бэлчээрлэлтэд цаг агаарын хүйтэн нөхцөл ихээхэн нөлөөлдөг бөгөөд үүнийг агаарын температур, салхины хурдны хослолоор тодорхойлж болно. Судалгаагаар өвлийн улиралд малын бэлчээрлэлт агаарын температур -32 °C, салхигүй байх үеэс хүндэрч, -41 °C хүрэхэд саатдаг болох нь тогтоогджээ.
Цаг уурын мэдээгээр, 2026 оны нэгдүгээр сарын 15-наас эхлэн нутгийн хойд хэсгээр, цаашдаа ихэнх нутгаар хүйтний эрч эрс чангарч, шөнөдөө -25…-45 °C, өдөртөө -18…-35 °C хүрч хүйтрэх төлөвтэй байгаа аж.
Иймд малчид, иргэдэд дараах зөвлөмжийг хүргэж байна:
-
Малыг хэвтрээсээ даарахаас сэргийлж, хашаа, саравчны дулаан алдагдуулахгүй хадгалах
-
Хүйтний оргил өдрүүдэд малыг илүү их тэжээх, тэжээлийн хэмжээг нэмэгдүүлэх, хужир шүү нэмэлтээр өгөх
-
Их хүйтэнд бог малыг хашаа, хороо, нөмөр нөөлөг газарт олноор бөөгнөрүүлэхгүй байх, дарагдаж үхэж хорогдохоос сэргийлэх
-
Малыг ойрын бэлчээрт энгэр ээвэр, нөмөр газар руу гарган бэлчээрлүүлэх
Малчид, иргэдийг малын эрүүл мэнд, амь насанд аюулгүй байдлаа хангахын тулд сэрэмжтэй байхыг Хөдөө аж ахуйн мэргэжлийн байгууллагууд анхааруулж байна.
|
Нийгэм
