Нийтийн тээврийн бодлогын газрын 70044040 дугаарын утсанд иргэдээс ирсэн талархал, санал, хүсэлт, гомдлын мэдээллийг хүргэж байна. Үүнд:

Талархал: Баянзүрх дүүргийн иргэн С.Базардорж: Би Офицеруудын ордон хойд автобусны буудал дээр Ч:40 (Махимпекс-Улаанхуаран) чиглэлийн автобусыг хүлээгээд зогсож байхад энд ажиллаж байгаа хоёр шалгагч үнэхээр сайн ажиллаж байгаад баярлаж байна. Иргэн бүрд зөвлөгөө өгөөд, карт цэнэглээд хандлага нь маш зөв байна.

Талархал: Баянзүрх дүүргийн иргэн Янжиндолгор: Ч:33 (Хайрхан хөгжлийн төв-Сансарын тойрог) чиглэлд явж байгаа "Зорчигч тээвэр нэг" ОНӨААТҮГ-ын 1-155 гарааш дугаартай автобусны жолооч Н.Дамдинрагчаа нь эелдэг зан харилцаатай,  сэтгэгдэл өндөр үйлчлүүлээд буулаа маш их баярлалаа.

Талархал: Чингэлтэй дүүргийн иргэн П.Пүрэвдолгор: НТБГ-ын тээвэр зохицуулагч Б.Саранчимэг, Г.Баасанжав орой 23:00 цагийн үед шөнийн тээврийн автобусны талаар тодорхой мэдээлэл өгч, суулгаж өгсөн. Үнэхээр сэтгэл хангалуун байлаа. Маш их баярлалаа.

Талархал: Хан-Уул дүүргийн иргэн Б.Цэвэлсүрэн: Х:7 (Туултосгон-Хангарьд ордон) чиглэлд явж байгаа "Зорчигч тээвэр дөрөв" ОНӨААТҮГ 15-082 гарааш дугаартай автобусны жолооч О.Энхтайван мартаж буусан цүнхийг минь хадгалж, бүрэн бүтэн хүлээлгэж өгсөнд баярлалаа.

Талархал: Сүхбаатар дүүргийн иргэн Батчулуун: М:4 (Шархад-Цамбагарав) чиглэлд явж байгаа "Зорчигч тээвэр хоёр" ОНӨААТҮГ-ын 2-180 гарааш дугаартай автобусны жолооч С.Энхбаатар нь харилцаа хандлага сайтай, настай хүнд тусархуу, тээврийн хэрэгсэл цэвэрхэн тухтай байсан.

Иргэний гомдол: Иргэн Энхбаатар: Ч:75 (Архивын ерөнхийн газар-5 шар) чиглэлийн 3-214 гарааш дугаартай тээврийн хэрэгслийн жолооч хэл амаар доромжилсон маш их гомдолтой.

Иргэний гомдол: “Оргил рашаан сувилал” буудлаас “Жаргалант хотхон” буудлын хооронд 11-108 гарааш дугаартай автобусны жолооч зорчигчоо авалгүй явж, хүнээ гүйцэт суулгаагүй байж хөдөлсөн гэх мэт зөрчил гаргаж ажилласан.

Иргэний гомдол: Баянзүрх дүүргийн иргэн Б.Сүүндэлгэр: Баянзүрх дүүргийн буудал дээр 1-004 гарааш дугаартай автобус гарц дээр зогсож байгаад буудал дээрээ зогсохгүй явсан. Гомдолтой арга хэмжээ тооцож, хариу өгнө үү?

Иргэний гомдол: Баянзүрх дүүргийн иргэн М.Мөнхсаруул: М:1Б (Сүхбаатарын талбай-Ботаник) чиглэлд явж байгаа 25-044 гарааш дугаартай автобусны жолооч хэл амаар доромжилсон арга хэмжээ авч хариу өгнө үү.

Иргэний гомдол: Шалгагч Түвшингэрэл: Эрдэм транс ХХК-ийн 13-286 гарааш дугаартай автобус Саппорогийн урд буудал дээр зогсоогүй явсан. Суух иргэд их байсан. Арга хэмжээ тооцож өгнө үү?

Шийдвэрлэлт: Иргэдийн ирүүлсэн гомдлын дагуу жолооч нарт сануулах арга хэмжээ авсан.

Иргэний гомдол: Баянзүрх дүүргийн иргэн Н.Саруул: М:1Б (Сүхбаатарын талбай-Офицер-Ботаник) чиглэлийн 25-044 гарааш дугаартай автобусны жолооч нь хөдөлгөөний аюулгүй байдлыг хангаж ажиллаагүй. Тэргэнцэртэй хүн гүйцэт бууж дуусаагүй байхад хөдөлснөөс болж унасан.

Шийдвэрлэлт: Зорчигч тээвэр тав ОНӨААТҮГ-ын 25-044 гарааш дугаартай жолоочийг шалгаж гаргасан зөрчилд нь Зөрчлийн тухай хуулиар 25 нэгжтэй тэнцэх хэмжээний төгрөгөөр торгох шийтгэл оногдууллаа.

Иргэний гомдол: 1-150 гарааш дугаартай автобус буух цаг болоогүй байхад эцсийн буудал хүртэл яваагүй, хоёр уулзварын хооронд маш удаан бүр маш удаан мөлхөж явсан, үүнээс болж дамжин суух байсан автобуснаас хоцорсон.

Шийдвэрлэлт: Зорчигч тээвэр нэг ОНӨААТҮГ-ын жолоочид байгууллагын дотоод журмаар арга хэмжээ тооцохоор болсон.

Иргэний гомдол: Ч:48А (Зүүн салааны шинэ эцэс-МУБИС) чиглэлийн автобус хоорондын зай маш хол байна. Цагийн хуваарь огт баримтлахгүй байна. Автобусны буудал дээр 45 минут хүлээлээ. Тус чиглэлийн ганцхан автобус нэг талдаа гарсан байна. Энэ асуудлыг шийдэж өгнө үү.

Шийдвэрлэлт: Тухайн чиглэлийн автобуснуудыг цагийн хуваарь мөрдөж ажиллах талаар Зорчигч тээвэр гурав ОНӨААТҮГ-ын ээлжийн инженерт хугацаатай үүрэг өгсөн.