Анх Нийгата мужийн их сургуулийн оюутнууд Монгол Улсыг танин мэдэх, судалгаа хийх зорилготой хэрэгжиж эхэлсэн уг төсөл энэ жилээс их сургуулиудын хамтарсан сургалтын хөтөлбөр болон өргөжсөнөөр ШУТИС-ийн 5, МУИС-ийн 5, Нийгата мужийн их сургуулийн 10, нийт 20 оюутан хөтөлбөрт хамрагдаж, эдийн засаг, боловсрол, олон улсын хамтын ажиллагаа, байгаль орчин, хүнс ба хоол тэжээл гэсэн чиглэлээр 5 багт хуваагдан хамтарсан судалгаа хийв. Хээрийн сургалтын хүрээнд оюутнууд Төв аймгийн Сэргэлэн суманд очиж, нүүдэлчин малчдын амьдрал ахуй, орон нутгийн боловсролын нөхцөл байдалтай танилцан, мөн жуулчны баазад монгол гэрт хонож, Монголын уламжлалт ахуй, соёлыг биечлэн мэдэрсэн нь оюутнуудын хувьд Монгол орны талаарх ойлголтоо гүнзгийрүүлэх, танхимын сургалтаар олж авсан мэдлэгээ бодит орчинд бататгах чухал туршлага боллоо.

Мөн хамтарсан судалгааны чиглэлүүдтэй уялдсан сэдвээр Нийгата мужийн их сургууль, МУИС, ШУТИС-ийн багш нар лекц уншиж, оюутнуудтай мэдлэг, туршлагаа хуваалцжээ. Хөтөлбөрийг амжилттай хэрэгжүүлэхэд Монгол-Японы Хүний нөөцийн хөгжлийн төв чухал үүрэг гүйцэтгэж байна. Энэхүү хамтарсан хөтөлбөр нь хоёр орны оюутан, залуучуудын мэдлэг, ур чадварыг дээшлүүлэх, харилцан ойлголцлыг гүнзгийрүүлэхийн зэрэгцээ боловсрол, судалгааны салбар дахь олон улсын хамтын ажиллагааг өргөжүүлэн хөгжүүлэхэд бодитой хувь нэмэр оруулж буй чухал санаачилга юм.