ТАТАР МАЙДАР
Олон улсын нэр хүндтэй “Our World in Data” байгууллагаас гаргасан “Эмэгтэйчүүдийн иргэний эрх чөлөөний индекс 2025” (Women's Civil Liberties Index 2025) дэлхийн чансааг шинэчлэн танилцууллаа. Уг жагсаалтаар Монгол Улс дэлхийн 170 гаруй орноос 73 дугаар байрт, Ази тивдээ 6 дугаарт эрэмбэлэгдэж, бүс нутагтаа хүний эрх, эмэгтэйчүүдийн эрх чөлөөг хангагч тэргүүлэгч орнуудын нэг болохоо дахин баталлаа.
Ази тивийн өндөр хөгжилтэй орнуудын дараа 6 дугаар байрт бичигдэв
Нийт жагсаалтад багтсан Азийн орнуудыг тусд нь ангилж үзвэл Монгол Улс тэргүүлэгч орнуудын эгнээнд багтаж байна. Манай улс Ази тивийн хэмжээнд Япон, Өмнөд Солонгос, Тайвань, Хонконг, Шри-Ланка улсуудын дараа буюу уг индексээр Азид 6 дугаар байрт бичигджээ. Энэ нь Зүүн өмнөд болон Өмнөд Азийн Малайз, Сингапур, Филиппин, Вьетнам зэрэг өндөр хөгжилтэй, эдийн засгийн хувьд хүчирхэг орнуудаас эмэгтэйчүүдийн иргэний эрх чөлөөний үзүүлэлтээр илүү дээгүүр түвшинд байгааг харуулж байна.
Хөрш Орос болон Төв Азийн орнуудыг хол дагуулав
Монгол Улс нь газар зүйн бүс нутгийн хувьд хойд хөрш ОХУ болон Төв Азийн орнуудтай харьцуулахад хол давуу үзүүлэлтээр жагсаалтыг тэргүүлжээ.
- Монгол Улс — Дэлхийд 73-р байр
- Киргиз Улс — Дэлхийд 96-р байр (Монголоос 23 байраар доогуур)
- Казахстан Улс — Дэлхийд 113-р байр (Монголоос 40 байраар доогуур)
- Оросын Холбооны Улс — Дэлхийд 130-р байр (Монголоос 57 байраар доогуур)
- Тажикистан Улс — Дэлхийд 158-р байр (Монголоос 85 байраар доогуур)
- Туркменистан Улс — Дэлхийд 172-р байр (Монголоос 99 байраар доогуур)
Дэлхийн чансааг Герман тэргүүлж, Афганистан сүүл мушгив
Эмэгтэйчүүдийн иргэний эрх чөлөө хамгийн өндөр хангагдсан орноор Герман (1), Бельги (2), Дани (3), Испани (4), Люксембург (5) зэрэг Европын орнууд шалгарсан байна. Харин жагсаалтын хамгийн сүүл буюу эмэгтэйчүүдийн эрх хамгийн их зөрчигддөг орноор Судан (174), Эритрей (175), Афганистан (176) болон Хойд Солонгос (177) улсууд нэрлэгджээ.
Энэхүү судалгааны дүн нь Монгол Улс ардчилсан засаглалтай, иргэний нийгмийн суурь эрх чөлөө, тэр дундаа охид, эмэгтэйчүүдийн нийгэм, улс төрийн оролцоо, эрхийг хамгаалах тал дээр бүс нутагтаа тод гэрэлтсэн үлгэр жишээ улс хэвээр байгааг илтгэж байна.
|
)
Нийгэм
