АДМИН
“Сан петролиум” ХХК түлш, шатахууны агуулах сав барих ажлаа бүрэн дуусгасан байна. Энэ тухай тус компанийн Дэд захирал Э.Энхцэцэгээс тодрууллаа.
“Сан петролиум” компани шатахууны нөөцийн агуулах байгуулах ажлаа хэзээ эхэлж, хэзээ ашиглалтад оруулсан бэ?
Манай компанийн шатахуун хадгалах агуулахын бүтээн байгуулалтын ажил 2025 оны наймдугаар сард эхэлсэн. Эхний ээлжид 2025 онд 8,000 м³ багтаамжтай агуулахаа барьсан. Харин 2026 онд Засгийн газрын дэмжлэгтэйгээр төслийн дараагийн үе шатыг хэрэгжүүлж, нийт хүчин чадлыг 16,000 м³ болгон нэмэгдүүлсэн. Ингээд 2026 оны наймдугаар сард үндсэн бүтээн байгуулалтын ажил дуусаж, одоо үйл ажиллагаагаа эхлүүлээд ажиллаж байна.
Танай агуулах Улаанбаатар хотын түлш шатахууны хэд хоногийн нөөц хадгалах хүчин чадалтай вэ?
Манай агуулах нийт 16 сая литр шатахуун хадгалах хүчин чадалтай. Энэ нь Улаанбаатар хотын АИ-92 автобензиний хэрэглээг тооцоход ойролцоогоор 13 хоногийн нөөцтэй тэнцэх хэмжээ юм. Харин манай компанийн хувьд өөрийн шатахуун түгээх станц болон борлуулалтын үйл ажиллагааны 2–3 сарын хэрэглээний нөөцийг хадгалах боломж бүрдээд байна.
Шатахууны агуулах савандаа нөөц бүрдүүлэх ажлаа эхэлсэн болов уу?
Манай компанийн хувьд зөвхөн тухайн үеийн борлуулалтын хэрэгцээг хангах бус, нийлүүлэлтийн тасралтгүй байдлыг хангах тодорхой хэмжээний нөөцтэй байх зарчим баримталдаг. Өнөөдрийн байдлаар манай өөрийн шатахуун түгээх станцуудын хэрэглээний ойролцоогоор 25 хоногийн автобензиний, 30 хоногийн дизель түлшний нөөц бүрдээд байна. Цаашид агуулахын хүчин чадлаа бүрэн ашиглаж, зах зээлийн нөхцөл байдал болон нийлүүлэлтийн эрсдэлтэй уялдуулан нөөцийн хэмжээг нэмэгдүүлэх боломжтой.
Түлш, шатахууны агуулах сав байгуулах ажил сүүлийн 30 гаруй жил хийгдээгүй. Энэ удаа Засгийн газрын дэмжлэг бүтээн байгуулалтын ажилд хэр хувь нэмэртэй байсан бэ?
Шатахууны агуулах барьж байгуулах нь их хэмжээний хөрөнгө оруулалт шаарддаг, урт хугацааны төсөл байдаг. Тиймээс хувийн хэвшлийн аж ахуйн нэгжүүдийн хувьд дангаараа хэрэгжүүлэхэд санхүүжилтийн өртөг, зээлийн хүүгийн дарамт зэрэг олон хүндрэл тулгардаг. Үүнтэй холбоотойгоор сүүлийн 30 гаруй жилд шатахууны агуулахын томоохон бүтээн байгуулалт хангалттай хэмжээнд хийгдээгүй гэж харж байна. Харин энэ удаа Засгийн газраас шатахууны нөөц, хадгалалтын хүчин чадлыг нэмэгдүүлэх асуудлыг бодлогын түвшинд авч үзэж, зээлийн хүүгийн хөнгөлөлтөөр дэмжсэн нь манай төсөл хэрэгжихэд маш чухал түлхэц болсон. Аль ч улсын хувьд түлш, шатахуун бол стратегийн ач холбогдол бүхий бүтээгдэхүүн. Тиймээс зөвхөн импортын хэмжээг нэмэгдүүлэхээс гадна шатахууныг дотооддоо тодорхой хэмжээгээр нөөцлөх, хадгалах хүчин чадлыг бий болгох нь маш чухал гэж бид үздэг.
Сүүлийн жилүүдэд олон улсын зах зээл болон геополитик, логистикийн нөхцөл байдлаас шалтгаалан шатахууны үнэ өсөх, нийлүүлэлт тасалдах эрсдэл байнга үүсэж байна. Ийм үед дотоодын агуулах, хадгалалтын хүчин чадлыг нэмэгдүүлж, тодорхой хэмжээний нөөц бүрдүүлэх нь нийлүүлэлтийн болзошгүй эрсдэлийг бууруулахад чухал ач холбогдолтой. Тиймээс шатахууны агуулахын хүчин чадлыг нэмэгдүүлэх чиглэлд Засгийн газраас баримталж байгаа бодлого нь урт хугацаанд шатахууны хангамжийн тогтвортой байдлыг хангахад чухал ач холбогдолтой гэж харж байна. Энэ салбарт үйл ажиллагаа явуулж буй хувийн хэвшлийн хувьд бид өөрийн хөрөнгө, мэдлэг, туршлагадаа үндэслэн Засгийн газрын бодлогын дэмжлэгтэйгээр шатахууны нөөц, хадгалалтын дэд бүтцийг нэмэгдүүлэхэд бодит хувь нэмэр оруулж байгаадаа баяртай байна.
|
Нийгэм
