2024 оны 12 дугаар сарын 14-ны 08 цагаас 12 дугаар сарын 15-ны 08 цаг хүртэлх цаг агаарын тойм 

Цасны зузаан: Өнөө өглөөний цаг уурын станц, харуулын цасны зузааны мэдээгээр баруун болон төвийн аймгуудын ихэнх нутаг, говийн аймгуудын нутгийн баруун болон хойд хэсэг, зүүн аймгуудын нутгийн зарим газраар 0.0-23.0 см цасан бүрхүүл тогтсоноос хамгийн их нь Баянхонгорын Гурванбулагт 23.0 см, Жаргалант, Баянбулагт 13.0 см, Завханы Цагаанчулуут, Сэлэнгийн Бугантад 12.0 см, Баян-Өлгийн Сагсай, Сэлэнгийн Хүдэр, Увсын Малчинд 11.0 см, бусад хэсгээр 0.0-10.0 см зузаан цасан бүрхүүл тогтсон байна.  

Хур тунадас: Өчигдөр өдөр Дорнодын Халх голоор 0.2 мм цас орсон. Бусад нутгаар цас ороогүй.

Агаарын хамгийн их температур: Завхан голын эх, Монгол-Алтайн уулархаг нутаг, Идэр голын хөндийгөөр -25…-31 градус, Увс нуур болон Дархадын хотгор, Хөвсгөлийн уулархаг нутаг, Хүрэнбэлчир орчим, Ерөө голын хөндийгөөр -17…-23 градус, Хангайн нурууны өвөр бэл, говийн бүс нутгийн өмнөд хэсэг, цас багатай энгэр ээвэр газар, Хэрлэн, Онон, Улз голын хөндий, Дорнодын тал нутгаар -1…-8 градус, бусад нутгаар -9…-16 градус хүйтэн байв. 

Агаарын хамгийн бага температур: Завхан голын эх, Хүрэнбэлчир орчим, Идэр голын хөндийгөөр -35…-43 градус, Их нуурууд болон Дархадын хотгор, Монгол-Алтай, Хангай, Хөвсгөлийн уулархаг нутаг, Тэс, Туул голын хөндийгөөр -27…-34 градус, Хангайн нурууны өвөр бэл, говийн бүс нутгийн өмнөд хэсэг, Хэрлэн, Онон, Улз голын хөндий, Дорнодын тал нутгаар -10…-16 градус, бусад хэсгээр -18…-24 градус хүйтэн хонов. 

Cалхи: Өнгөрсөн хоногт ихэнх нутгаар секундэд 3-8 метр, говь, талын нутгаар секундэд 12-14 метр хүрч ширүүссэн байна. 

Улаанбаатар хот орчмоор: Өнгөрсөн хоногт цас ороогүй. Салхи баруун өмнөөс секундэд 2-7 метр. Өчигдөр өдөр -11…-13 градус, өнгөрсөн шөнө Яармаг-Сонгины орчмоор -28 градус, бусад хэсгээр -21 градус хүйтэн хоносон байна.