АДМИН
Код бичих охидын хөтөлбөр (Girls code) НҮБ-ын Хүүхдийн сантай хамтран охидод STEM (шинжлэх ухаан, технологи, инженерчлэл, математик) чиглэлээр ур чадвар олгох “Girls Code-2025” хөтөлбөрөө зарлаж байна.
НҮБ-ын Хүүхдийн сангийн санхүүжилттэй энэ хөтөлбөр нь үсрэнгүй хөгжиж буй технологийн салбарт хүйсийн тэгш бус байдлыг бууруулах зорилготой юм.
Хөтөлбөрийн элсэлт 2025 оны 03 дугаар сарын 31-нээс 4 дүгээр сарын 20 хүртэл үргэлжилнэ. Монгол орны алслагдсан орон нутагт амьдарч буй охидыг энэхүү хөтөлбөрт хамрагдахыг урьж байна.
Уг хөтөлбөр нь практик дээр код бичих сурахаас гадна англи хэл, зөөлөн ур чадвар болон салбартаа манлайлж буй залуучуудаас суралцах боломжтой юм.
Код бичих охидын хөтөлбөр хэрэгжиж эхэлсэн цагаас хойш өнөөдрийг хүртэлх хугацаанд алслагдсан орон нутагт амьдарч буй 110 охинд мэдээллийн технологийн боловсрол олгосон. Тэд өнөөдөр нэр хүндтэй дотоод болон гадаадын их сургуульд тэтгэлгээр суралцаж, олон улсын шинж чанартай код бичих уралдаан тэмцээнд амжилттай оролцож байна.
ЮНЕСКО-ийн сүүлийн үеийн тайлангаар дэлхийн технологийн салбарт эмэгтэйчүүдийн эзлэх хувь ердөө 26% байдаг бол Монголд энэхүү зөрүү бүр илүү тод ажиглагдаж, STEM чиглэлээр ажиллаж буй хүмүүсийн дөнгөж 20%-ийг эмэгтэйчүүд эзэлж байна. Иймд Girls code хөтөлбөр НҮБ-ын Хүүхдийн сантай хамтран дээрх тэгш бус байдлыг бууруулж, монгол охидыг дижитал шилжилтийн эрин үеийн бүтээлч, оролцогч, манлайлагч болгохыг зорьж байна.
Тус хөтөлбөрийг санаачлагч Б.Болор-Эрдэнэ хэлэхдээ “Girls Code нь охидод STEM карьерын замыг нээж өгөх зорилготой. НҮБ-ын Хүүхдийн сантай хамтран ажилласнаар тус хөтөлбөрийн хүрээ өргөжиж, орон нутгийн охидод хүрч, тэднийг амжилтад хүргэхэд шаардлагатай ур чадварыг олгоход оршиж байна” гэсэн бол
НҮБ-ын Хүүхдийн сангийн суурин төлөөлөгч : “ЮНИСЕФ нь охидод боловсрол, хөдөлмөр эрхлэх тэгш боломж олгох эрхийг дэмжих зорилгоор Girls code хөтөлбөрийг дэмжиж байгаадаа бахархаж байна. Охидод хөрөнгө оруулснаар бид илүү хүртээмжтэй, шинэлэг бөгөөд цэцэглэн хөгжсөн ирээдүйг бүтээх болно" гэлээ.
Тус хөтөлбөрийг сонирхсон охид 2025 оны 03 дугаар сарын 31-ээс эхлэн Girlscode.mn албан ёсны сайтаар бүртгүүлэх боломжтой. Суудлын тоо хязгаартай.
Girls code хөтөлбөр нь охидыг бичих, технологи болон манлайллын ур чадвараар дамжуулан чадавхжуулах зорилготой ашгийн бус байгууллага юм.
НҮБ-ын Хүүхдийн сан нь дэлхийн 190 гаруй улс оронд хүүхдүүдийн амь насыг хамгаалах, тэдний эрхийг хангах, бага наснаас өсвөр үе хүртэлх бүрэн боломжоо нээхэд нь тусалж ажилладаг.
Доорх линкээр бүртгүүлнэ үү!
Холбоо барих:
- Girls code
- E-mail: info@girlscode.mn
- НҮБ-ын Хүүхдийн сан
- E-mail: ulaanbaatar@unicef.org
|
Нийгэм
