Хэнтий, Сэлэнгэ аймгуудад хээрийн түймэр гарчээ. Тодруулбал: 

Хэнтий аймгийн Дэлгэрхаан сумын Хэрлэн тооно багийн “Хаяа” гэдэг газар /аймгийн төвөөс баруун зүгт 150 км, сумын төвөөс зүүн урд зүгт 24 км/ хээрийн гал түймэр гарсан тухай дуудлагыг дөрөвдүгээр сарын 01-ний өдрийн 13:11 цагт хүлээн авсан. Тус аймгийн Дэлгэрхаан сумын Засаг даргын Тамгын газрын ажилчид, орон нутгийн иргэд хээрийн гал түймрийг унтраах ажиллагааг зохион байгуулан ажиллаж 13:40 цагт цурамд оруулан, 15:30 цагт бүрэн унтраасан байна. Урьдчилсан байдлаар хээрийн гал түймэрт 8 га талбай өртөж шатжээ.

Мөн Сэлэнгэ аймгийн Баянгол сумын 3 дугаар багийн “Урт хамар” гэдэг газар /аймгийн төвөөс урд зүгт 187 км, сумын төвөөс зүүн урд зүгт 20 км/ хээрийн гал түймэр гарч байна гэсэн дуудлагыг дөрөвдүгээр сарын 01-ний өдрийн 13:18 цагт хүлээн авсан. Тус аймгийн Онцгой байдлын газрын Баянгол сум дахь 40 дүгээр ангийн алба хаагчид, сумын Засаг даргын Тамгын газрын ажилчид, орон нутгийн иргэд хээрийн гал түймрийг унтраах ажиллагааг зохион байгуулан ажиллаж 14:15 цагт цурамд оруулан, 15:27 цагт бүрэн унтраажээ. Урьдчилсан байдлаар хээрийн гал түймэрт 21 га талбай өртөж шатсан байна.