Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын алба болон Сэлэнгэ аймаг дахь Шүүхийн Тамгын газартай хамтран насан хүрээгүй хүнийг гэмт хэргээс урьдчилан сэргийлэх ажлын хүрээнд “Өсвөр насныхан холбогдсон болон хохирсон гэмт хэрэг, түүнд нөлөөлж буй хүчин зүйл” хэлэлцүүлгийг Сэлэнгэ аймгийн Гэмт хэргээс урьдчилан сэргийлэх ажлыг зохицуулах салбар зөвлөлөөс 2025 оны дөрөвдүгээр сарын 2-ны өдөр зохион байгууллаа. Хэлэлцүүлэгт “Хүүхдийн эрхийн чиглэлээр УИХ-аас авч хэрэгжүүлж буй бодлого чиглэл”-ийн талаар УИХ-ын гишүүн Х.Баасанжаргал, “Монгол улсад хүүхдийн эсрэг гэмт хэргээс урьдчилан сэргийлэх талаар авч хэрэгжүүлж буй арга хэмжээ, бодлого чиглэл”-ийн талаар ГХУСАЗЗ-ийн дарга Л.Нямгэрэл, “Хэрэг хянан шийдвэрлэх ажиллагаан дахь хүүхдийн эрхийн асуудал, хүүхдийн эрхтэй холбоотой хууль тогтоомжийн хэрэгжилтийн өнөөгийн нөхцөл байдал, хүүхдийн эрхийг хэрэгжүүлэх, хүүхэд хамгаалал дахь цагдаа, прокурор, шүүхийн байгууллагын оролцоо, чиг үүрэг”-ийн тухай ХЭҮК-ийн гишүүн Ж.Хунан, “Өсвөр насныхан холбогдсон болон хохирсон гэмт хэрэг, зөрчлийн нөхцөл байдал, ял шийтгэл авсан өсвөр насныхны статистик, цаашид хэрэгжүүлэх арга хэмжээний санал”-ыг аймгийн Цагдаагийн газар, Прокурорын газар, Шүүхийн Тамгын газраас танилцууллаа. Мөн “Хүүхдийн эрхийн хууль зүйн хорооны үйл ажиллагаа, хүүхдийн эрхийг хэрэгжүүлэх, хүүхэд хамгаалал дахь төрийн захиргааны байгууллагын оролцоо чиг үүрэг”-ийг аймгийн Хүүхэд, гэр бүл, залуучуудын хөгжлийн газар, Боловсролын газар, “Аймгийн ГХУСАЗСЗ-өөс хүүхдийг гэмт хэргээс урьдчилан сэргийлэх чиглэлээр авч хэрэгжүүлж буй ажил арга хэмжээ, бодлого чиглэл”-ийн талаар аймгийн ИТХ-ын дарга Г.Бат-Орхон оролцогчдод танилцуулав.

 

ХЭҮК-ын гишүүн Ж.Хунан оролцож илтгэлдээ “ХЭҮК нь Монгол Улс дахь хүний эрх, эрх чөлөөний байдлын талаарх 24 дэх илтгэлд “Эрүүгийн хэрэг хянан шийдвэрлэх ажиллагаан дахь бэлгийн хүчирхийллийн хохирогч хүүхдийн эрхийн зарим асуудал” сэдвийг тусгайлан тусгаж, холбогдох саналын хамт 2025 оны гуравдугаар сарын 31-ний өдөр УИХ-д хүргүүлсэн.

 

Монгол Улс нь Үндсэн хууль, хууль тогтоомжид хүүхдийн халдашгүй чөлөөтэй байх эрхийг хангах зохицуулалт, төрийн зохих байгууллагын үүргийг хуульчилсан ч нийгэм хурдацтайгаар хувьсан өөрчлөгдөж буй энэ цаг үед хүүхэд бэлгийн хүчирхийллийн хохирогч болох тохиолдол хурдацтай өсөж байгаад төр, засгаас онцгой анхаарал хандуулах шаардлагатай” гэдгийг онцоллоо.

 

“Өсвөр насныхан холбогдсон болон хохирсон гэмт хэрэг, түүнд нөлөөлж буй хүчин зүйл” сэдэвт хэлэлцүүлэгт Сэлэнгэ аймаг дахь хууль сахиулах болон хүүхэд хамгааллын чиглэлээр үйл ажиллагаа явуулдаг төрийн захиргааны байгууллагууд, Хүүхдийн эрхийн хууль зүйн хороо, аймгийн 17 сумын хамтарсан багийн төлөөлөл, аймгийн хэмжээний 57 багийн Засаг дарга, боловсролын байгууллагын төлөөлөл, хүүхдийн эрхийн чиглэлээр үйл ажиллагаа явуулдаг иргэний нийгмийн байгууллагын төлөөлөл оролцож, байр сууриа илэрхийлж, санал хүсэлтээ уламжиллаа.