С.ОТГОНБАЯР
ШШГЕГ-ын дарга Б.Нандинболороос тодрууллаа.
-Сефьнээс нь 7.5 тэрбум төгрөг илэрсэн гаалийн хэлтсийн дарга С.Батдөл Төр хурхын амралтад байгаа гэж ХЗДХ-ийн сайд асан Б.Энхбаяр гишүүн хэллээ. Үнэхээр тэр хүн амралтад байгаа юм уу?
-Ялаа эдэлж байгаа. Тэр хүн чинь 7.3 жил авсан шүү дээ. Гурван шатны шүүхээр ялаа аваад хорих ангид ялаа эдэлж байгаа. 409 гээд хуучин эмэгтэйчүүдийн хорих ангийн суурин дээр баригдсан. Тэр хорих ангид С.Батдөл ялаа эдэлж байгаа.
-Төр хурхын амралтад ажиллаж байсан юм уу?
-Одоо зоондоо ялаа эдэлж байгаа. 409 дүгээр хорих анги буюу БЗД-ийн товчоогоор гараад Ногоон зоорь гээд байдаг. Түүний дэнжид байх ангид хорих ялаа эдэлж байгаа. Энэ хүн 2023 оны арваннэгдүгээр сард шүүхээр таслагдаад манай хорих ангийн мэдэлд ирсэн. Манай байгууллагын харьяа. Тэгээд 2024 оны есдүгээр сарын 29-ний өдөр Төр хурхын амралтын газарт аж ахуй хийсэн. Яагаад гэвэл есөн сар гараад хүйтний улирал эхэлдэг учир галчаар дөрвөн хоригдол харуул хамгаалалтын ажилтантай үүрэг гүйцэтгэсэн. Тэр амралт биш. Манай ахмад өндөр настнуудаа сувилах, алба хаагчдаа амраах чиглэлийн үйл ажиллагаатай аж ахуйн тооцоот үйлдвэрийн газар. Тэр нь өөрөө хуулиар хориглосон зүйл байхгүй. Аль ч хоригдлыг гаргаж болно. Хуваарилах асуудал нь манай байгууллагын тэргүүн дэд даргын ахалсан Хорих ял эдлүүлэх албаны зөвлөл гэж байдаг. Тэр зөвлөлөөр хэлэлцээд хуваарилдаг. Мөн аж ахуйн хэсэгт гаргахдаа прокуророос зөвшөөрөл авч гаргадаг.
-Хэр удаан хугацаанд тэнд ажилласан юм бэ?
-Нэг сар хориод хоног байсан юм билээ. Тэгээд буцаагаад прокурорын тогтоолоор 2024 оны арваннэгдүгээр сард хорих анги руу татсан байна лээ. Одоо хорих ангидаа ялаа эдэлж байна.
-Д.Цогтбаатар гишүүнд ял оноосон. ШШГБ шүүхийн шийдвэрийг биелүүлэх ёстой. Танайх яагаад үүнийг хэрэгжүүлэхгүй байна вэ?
-Манайд энэ хүний шүүхийн шийдвэр албажлаа гэсэн шийтгэх тогтоол ирээгүй. Ирвэл бид холбогдох хуулийн хүрээнд шийдвэр гүйцэтгэх ажиллагааг албадан биелүүлэх үүрэгтэй.
-Шүүхийн шийдвэр гарангуут Шүүхийн шийдвэр гүйцэтгэх байгууллага үүргээ хэрэгжүүлдэг. Гэтэл энэ хүнд яагаад ингэж ялгамжтай хандаад байна вэ?
-Үүнийг ялгаж салгаж ойлгох хэрэгтэй. Хорих ял оногдуулсан тохиолдолд цагдаагийн байгууллага шууд манай мэдэлд авчирч өгдөг. Тэр хүн шийдвэрээ аваад дараагийн давж заалдах эрх нээлттэй байдаг учраас давж заалдах шатны шийдвэр гарсны дараа манайхаас хорих ангид хуваарилах үүрэг хүлээдэг. Түүний дагуу зөвлөлөө хуралдуулаад тухайн ял шийтгэгдсэн нөхрийг хорих ангид хуваарилдаг. Д.Цогтбаатар гишүүний хувьд хорихоос өөр төрлийн ял оногдуулсан юм байна лээ. 20 сая төгрөгийн торгууль, төрийн албанд ажиллах эрхийг тодорхой хугацаанд хязгаарласан. Энэ нь шүүхийн шийдвэр гарлаа алх цохилоо гээд шийдвэр нь ирээгүй учраас ирсэн шийдвэрийн хүрээнд л холбогдох ажиллагааг явуулна. Бүртгэлд авна, цахимд бүртгэнэ. Мөнгөн торгуулиа хийх хугацааг зааж өгнө. Түүний дагуу мэдэгдэл явуулна. Түүнийг биелүүлэхгүй бол албадлагын арга хэмжээ авна.
-П.Батчулуун эмч хоригдож байх хугацаандаа сүрьеэ авсан тухай УИХ-ын гишүүн Ж.Чинбүрэн мэдээлсэн. Биеийн байдал нь ямар байгаа бол. Сүрьеэ туссан нь үнэн үү?
-П.Батчулуун эмч сүрьеэ туссан гэх мэдээлэлд манай байгууллагын зүгээс олон нийтийн сүлжээнд ташаа мэдээлэл гэдгийг мэдэгдсэн. Манайхаас сүрьеэ өвчин авах ямар ч боломж байхгүй. Биеийн байдал нь хэвийн байгаа гэж байна лээ. Давах шатны магадлал ирсэн. Тэгэхээр бид эмнэлгээс нь татах ажлыг зохион байгуулж, хорих ангид хуваарил гэдэг чиглэлээ өгчихсөн байгаа. Хоёр хоногийн өмнө шийдвэр ирлээ гэж надад мэдэгдсэн.
|
Нийгэм
