Монгол Улсын гурван шатны шүүхээр гэмгүй иргэдийг эрүүдэн шүүсэн хэргээр ял авсан ТЕГ-ын дарга асан Б.Хурц Тайвань Улс дахь консул болохоор яригдаж буй талаар чих дэлслээ. Түүнийг хамтарсан Засгийн газрын хүрээнд Ардчилсан намаас санал болгож байгаа гэх. Уг асуудлаар АН-ын дарга Лу.Гантөмөрөөс тодруулахад "Ардчилсан нам энэ Засгийн ачааг үүрэлцэх ёстой. Томилгоо хийх бүрт ингэж дайрахаа боль" гэсэн хариулт хэлсэн юм. Харин хүний эрхийн зөрчил гаргаж гурван шатны шүүхээр ял зам хүлээсэн хүн дипломат албанд томилогдох нь зүй ёсных уу? танай намд өөр боловсон хүчин байхгүй юу гэсэн асуултад хариулт хэлж чадсангүй. Эрүүдэн шүүсэн гэмт хэрэгтэн нь дипломат алданд томилогдож болж байгаа бол эрүүдүүлсэн нь яах вэ гэх асуулт ч дагаад үүсч байна. 

Б.Хурц нь Ерөнхийлөгч асан Ц.Элбэгдоржийн хаяанд АТГ-ын дэд дарга, ТЕГ-ын дарга, хошууч генерал болтлоо дэвшсэн гэгддэг. Гэвч хүний эрхийг ноцтой зөрчсөн үйлдлүүд нь илэрч гурван шатны шүүхээр гэмгүй иргэдийг эрүүдэн шүүсэн хэргээр 1.6 жилийн ял авсан ч 2021.06.24-нд Ерөнхийлөгч асан Х.Баттулгын өршөөлөөр суллагдаж байв.  Мөн Ерөнхийлөгч Х.Баттулга Өмнөд Солонгост суух Элчин сайдаар томилсон ч, Солонгосын тал хүлээж авахаас татгалзаж байсан юм. 

Харин Ардчилсан ёсыг дээдлэгч Тайваньд консулаар сууж чадах уу? 

Б.Хурц энэ асуудалдаа өөрөө тайлбар хийсэнгүй. Тэрээр "Намайг хаашаа яв гэнэ тийшээ явна шорон байсан ч явна. Өөр ярих зүйл байхгүй" гэв.