2025 оны элсэлтийн ерөнхий шалгалтад оролцохоор бүртгүүлсэн шалгуулагчдын тоо өнөөдрийн байдлаар нийт бүртгэгдэх ёстой шалгуулагчдын 90 хувьд хүрээд байна хэмээн Боловсролын үнэлгээний төвөөс мэдээллээ.

Бүртгэлийн хугацаа 2025 оны 4 дүгээр сарын 20-ны өдрийн 18:00 цагт албан ёсоор хаагдана. Иймд шалгалтад оролцохоор төлөвлөж буй иргэд бүртгэлээ амжиж хийж, баталгаажуулахыг холбогдох албанаас анхааруулж байна.

БҮТ-өөс шалгуулагчдад дараах зөвлөмжийг хүргэв:

• Бүртгэлтэй холбоотой аливаа алдаа, зөрчил гарсан тохиолдолд Боловсролын үнэлгээний төвд шууд хандаж засварлуулах боломжтой.

• Бүртгэлийн хугацаанд шалгуулагчид өөрийн сонгосон хичээлүүдэд нэмэлт өөрчлөлт оруулах боломжтой.

• Бүртгэл хаах хугацаа ойртох тусам системийн ачаалал нэмэгддэг тул шалгуулагчид бүртгэлээ эрт гүйцэтгэж, баталгаажуулахыг уриалж байна.

Элсэлтийн шалгалтад ирэхдээ бүрдүүлэх шаардлагатай материалууд:

1. Иргэний үнэмлэх (эсвэл түүнтэй адилтгах баримт бичиг)

2. Бүртгэлийн хуудас

3. Суудлын хуваарь

4. Бүрэн дунд боловсролын үнэмлэх (төгсөгчдөд хамаарна)

Элсэлтийн шалгалт нь их, дээд сургуульд элсэхэд чухал шалгуур болдог тул бүртгэл болон шалгалтын бэлтгэлийг нухацтай хийхийг мэргэжилтнүүд зөвлөж байна.