Монгол бөхийн өргөөнд маргааш буюу 11-р сарын 16-нд Босоо хэмээх Г.Самдан аваргын мэндэлсний 120 жилийн ойд зориулсан Улс, аймгийн алдар цолтой 256 бөхийн барилдаантай. Мөн нөгөөдөр 11-р сарын 17-нд Аймаг цэргийн болон залуу бөхчүүдийн 256 бөхийн ээлжит барилдаан тус тус болно.
“Босоо” хэмээх Самдан аварга нь Цэцэн хан аймгийн Цэцэн вангийн хошуу буюу одоогийн Хэнтий аймгийн Баянхутаг сумын нутаг Эрдэнэ уулын ард 1899 онд буюу шаргачин гахай жил Ганжууржавын 9 хүүхдийн 7 дахь хүү нь болон мэндэлсэн.
Ид үедээ 190 см өндөр, 120 кг жинтэй байжээ. 15 настайдаа Сүнэдэд очиж наймаа панз хийж байхдаа анх барилдаж түрүүлэн бөхийн гараагаа эхэлжээ. 1923 оны наадамд Лу гүний Вандан аваргад унаж үзүүрлсэн бол, 1924 оны цэргийн наадамд мөн л үзүүрлэж “Арслан” цол, 1925 онд алдарт “Буур” Жамъян аваргыг орхиж 10 даван түрүүж, 26 насандаа “Улсын аварга” цол хүртжээ. Тэрээр 1938 онд долоо давж байжээ.
Түүнийг аймгийн наадамд 17, орон нутаг, овоо тахилгын наадамд 24 удаа түрүүлсэн гэж зарим өгүүлэл, номд бичсэн байх нь бий. Хүчтэй халж суйлах, дэгээдэх зэрэг мэхийг гарамгай хийдэг, бяр хүчээрээ гайхуулж явсан Самдан аварга амьдралынхаа сүүл үед мэдрэлийн өвчинд нэрвэгдэж 48 насандаа өөд болжээ.
