Архангай аймгийн Онцгой байдлын газрын Шуурхай штабаас ээлжит мэдээллээ хийв. Мэдээллийг шуурхай штабын дарга, ОБГ-ын дарга хурандаа Д.Эрдэнэбаатар, шуурхай штабын менежер, ЭМГ-ын дарга Р.Гандиймаа нар өгсөн юм.
АОК "Архангай аймагт коронавирусний батлагдсан тохиолдол 3 боллоо. Энэ нь анхны тохиолдлын гэр бүлийн хүн бөгөөд тусгаарлалтад орсон байсан. Аймгийн шуурхай болон тандалтын бүлэг Батцэнгэл суманд ажиллаж байна. Өнөөдрийн байдлаар PCR шинжилгээ хийдэг явуулын лабораторид 2 эмч, 1 генетикийн мэргэжилтэн ажиллаж байна.
Бид ойрын 58, дам хавьтлын 400 гаруй хүнийг тодорхой болгосон. Өнөөдрийн байдлаар 190 хүний шинжилгээний хариу гарсан ба нэг хүний шинжилгээ эерэг гарч батлагдсан тоо нэгээр нэмэгдлээ. Бусад хүнийх сөрөг гарсан ба Аймгийн Онцгой комисс, суманд ажиллаж буй шуурхай бүлгүүд, сумын Онцгой комисс хариу арга хэмжээг яаралтай авч 2 өдрийн дотор 553 хүний сорьцыг цуглуулсан.
Тархвар судлалыг хийж, эхний маршрутыг бүрэн гаргаад байна. Ер нь бид голомтыг хяналтдаа авч чадсан. Одоогийн байдлаар тархвар судлалын ажил үргэлжилж байна. Ихтамир сумын 3 иргэний PCR шинжилгээний хариу сөрөг гарсан. Журмын дагуу бид долоо хоногийн дараа 2 дахь шинжилгээг авна.
Цаашид АОК-оос 12 дугаар сарын 2-ноос тав хоногийн хугацаанд Батцэнгэл сумын 3771, Ихтамир сумын 5200 иргэнийг нэг иргэн-нэг шинжилгээ хэлбэрээр буюу бүх хүнийг шинжилгээнд хамруулна. Энэ хоёр сумаас өнөөдрийн байдлаар нийт 700 гаруй иргэний шинжилгээг аваад байгаа. PCR шинжилгээний урвалж, бусад эм, эмнэлгийн хэрэгсэл, хамгаалах хувцас хэрэгсэл болон амьсгалын аппарат 5 ширхэгийг ЭМЯ-наас шийдвэрлэж өгсөн. Шинжилгээ авахад хангалттай хүрнэ. Мэдээж хавьтлуудын дахин шинжилгээг авна.
УОК-ын шийдвэрийн дагуу Улаанбаатар хотоос иргэн татахгүй. Аймгийн хэмжээнд 40 гаруй пост ажиллаж байна. Цаашид өвчлөл нэмэгдвэл Нэгдсэн эмнэлгийн Халдвартын тасгийн 30 ор бэлдсэн байгаа. Энэ эмнэлгийг идэвхжүүлж, эндээ эмчилнэ. Батлагдсан 3 тохиолдлыг одоо Улаанбаатар хотод эмчилж байна" гэлээ.
