Индонезийн Балид 2022 оны 10-р сарын 13-наас 22-ны өдрүүдэд "2022 оны Ази тивийн аварга шалгаруулах өсвөрийн шатарчдын тэмцээн" зохион байгуулагдаж байна.
Энэ жилийн Ази тивийн аварга шалгаруулах тэмцээнд 20 орны 462 өсвөрийн шатарчин оюун ухаанаа уралдуулж өрсөлдөхөөр хуран чуулжээ.
Монгол улсаас Монголын шатрын холбооны удирдах зөвлөлийн нарийн бичгийн дарга Ч.Баттүвшингээр ахлуулсан 36 өсвөрийн тамирчин, дасгалжуулагч болон эцэг эх, дагалдан яваа 24, нийт 61 хүний өргөн бүрэлдэхүүнтэй энэ жилийн тивийн аварга шалгаруулах тэмцээнд оролцож байна.
Өнөөдөр тивийн аваргын тэмцээн шатрын РАПИД төрлөөр эхэлсэн ба хоёр мөнгөн медаль хүртэж тэмцээний салхийг хагаллаа. Х.ИТГЭЛТ /17-18 насны хөвгүүдийн ангилалд МӨНГӨН МЕДАЛЬ/, М.Цэлмэг/9-10 насны охидын ангилалд МӨНГӨН МЕДАЛЬ/ хүртлээ.
Маргааш үндсэн буюу СТАНДАРТ төрлийн тэмцээн эхэлнэ.
Тэмцээний өргүүд Монголын цагаар өдөр бүр 09.00 болон 16.00 цагаас эхэлж байна.
Монгол эх орноо төлөөлөн тивийн аваргын дэвжээнд тулалдаж байгаа 36 өсвөрийн шилдэг мастерууддаа болон дасгалжуулагч нартаа амжилт хүсье.
