2023 оны Боксын насанд хүрэгчдийн дэлхийн аварга шалгаруулах тэмцээн тавдугаар сарын 1-14 ний өдрүүдэд Узбекстаны нийслэл Ташкент хотноо болж өндөрлөлөө. Энэхүү тэмцээн нийт 107 орны 538 тамирчин оролцсоноос Монголын 10 тамирчин хүч үзэж, 63,5 кг-ийн жинд ОУХМ Монголын шигшээ багийн тамирчин Б.Чинзориг мөнгөн медаль хүртсэн амжилттай эх орондоо ирлээ.
ОУХМ Б.Чинзориг: " Миний хувьд дөрөв дэх удаагийн дэлхийн аварга шалгаруулах тэмцээндээ өрсөлдөж байна. Гурван удаа медалийн төлөө тулалдаж, энэ удаа мөнгөн медаль хүртлээ. Миний хувьд маш үнэ цэнтэй зүйл. Мөрөөдөл минь биеллээ. Тулаан бүрдээ сэтгэл зүйгээ бэлдэж, өөрийнхөө хийж чадах бүх зүйлээ дайчилж, төвлөрдөг. Хамгийн том зорилго бол олимп. Үүнээс наана 9 сард олимпын эрхийн тэмцээн Азийн наадмаар олгогдоно. Үүний төлөө зорьж, бэлтгэлээ хангана. Маш олон хүнд баярлаж, талархсанаа илэрхийлж байна. Та бүхний дэмжлэг туслалцаа байгаагүй бол энэ амжилтад хүрэхгүй байлаа" гэв.
