Цагдаагийн байгууллагаас иргэдэд хэрэгтэй, хэрэгцээтэй мэдээллийг хүргэх, цагдаагийн байгууллагын өдөр тутмын ажил, үйлчилгээтэй холбоотой мэдээллийг агуулсан иж бүрэн, аппликейшнийг иргэдэд зориулан бүтээжээ.
Тодруулбал та тухайн аппликейшнээр дамжуулан цагдаагийн байгууллагад гэмт хэрэг, зөрчлийн гомдол, мэдээллийг гаргах төдийгүй цагдаагийн байгууллага, алба хаагчтай холбоотой өөрийн гомдол, санал, хүсэлтийг уламжлах боломжтой.
Иргэн Та өөрт ойрхон цагдаагийн байгууллагын байршил, хаяг, холбоо барих дугаар зэргийг мөн харах боломжтой. Өөрөөр хэлбэл та тухайн аппликейшнийг утсандаа татаж, “Цагдаагийн байгууллагын байршил” цэс рүү орсноор “Google map” газрын зураг дээрээс цагдаагийн байгууллагын мэдээллийг дэлгэрэнгүй харах юм.
Тухайн аппликейшнд үндсэн 4 дэд 17 цэсээс та өөрт хэрэгтэй мэдээлэл, үйлчилгээг авах боломжтой ба хамгийн хэрэгтэй байж болох нэг цэс бол “Алдагдсан, гээгдүүлсэн гар утасны мэдээлэл шалгах” цэс юм.
Та хэн нэгнээс гар утас худалдан авах бол тухайн гар утасны “IMEI” кодыг тухайн талбарт оруулснаар хулгайлагдсан эсвэл цагдаагийн байгууллагад бүртгэлгүй зэрэг мэдээллийг авах юм.
Худалдан авах гэж буй утас тань тухайн цэсэд “бүртгэлгүй” бол тухайн утсыг худалдан авахад Танд ямар нэгэн эрсдэл үүсэхгүй. Харин тухайн утас цагдаагийн байгууллагад бүртгэлтэй буюу алдагдсан, гээгдсэн, хулгайлагдсан зэрэг мэдээлэлтэй байвал Та цагдаагийн байгууллагад нэн даруй мэдэгдэж, иргэний үүргээ биелүүлээрэй.
“102 POLICE” аппликейшн танилцуулга видео: https://youtu.be/jQb5SsoopJQ
Түүнчлэн Та “102 police” аппликейшнаар дараах үйлчилгээг авах боломжтой. Үүнд:
• Видео болон аудио дуудлага хийх
• Зөрчил мэдээлэх, шийдвэрлэлт харах
• Гомдол мэдээллийн шийдвэрлэлт харах
• Лавлагаа авах
• Торгуулийн мэдээлэл харах болон төлөх
• Замын хөдөлгөөний мэдээлэл харах
• Эрэн сурвалжлах болон сураггүй алга болсон иргэний мэдээллийг харж, мэдээлэл өгөх
• Бусад хэрэгцээт мэдээ, мэдээллийг шуурхай нэг дороос авах, харах боломжтой.
Цаашлаад Та цагдаагийн байгууллагад гаргасан өөрийн дуудлага, гомдол мэдээллийг аль байгууллагын хэн гэдэг алба хаагч шалгаж байгаа болон хуулийн хүрээнд ямар арга хэмжээ авч шийдвэрлэж ажилласан талаарх мэдээллийг нэг доороос хурдан шуурхай авах боломжтой аппликейшнийг Та татаж аваарай.
