Нийтийн тээврийн бодлогын газарт иргэдээс ирсэн талархлыг хүлээн авч, санал, гомдол, хүсэлт бүрийг тухай бүрд нь шийдвэрлэж байна.
Нийтийн тээврийн газарт сүүлийн гурван өдөр иргэдээс ирсэн санал, хүсэлт, гомдлыг хэрхэн шийдвэрлэснийг хүргэж байна.
Иргэний гомдол:
Иргэн Д.Чимэдцэрэн энэ сарын 19-нд Ч:32б чиглэлийн 25-071 гарааш дугаартай автобусны жолооч тамхи татаж байхад нь шаардлага тавихад хүлээн аваагүй тул арга хэмжээ авч өгнө үү хэмээн 7004-4040 дугаарт гомдол гаргасан.
Шийдвэрлэлт:
25-071 гарааш дугаартай Ч.Буяндалай жолоочид гаргасан гомдлыг хянаж, Зөрчлийн тухай хуулийн 14.6.9 дүгээр заалтаар 25 нэгжээр торгов.
Иргэний гомдол:
Баянгол дүүргийн 14-р хорооны иргэн Булгаа Ч:71 чиглэлийн 01-114 гарааш дугаартай автобусны жолооч энэ сарын 20-ны 07:05 цагт МУБИС-ийн автобусны буудал дээрээс хүнээ авахгүй хоосон явсан. Иргэдэд үйлчлэхгүй хүнээ авахгүй зорчсон тул арга хэмжээ авч өгнө үү хэмээн 7004-4040 дугаарт гомдол гаргасан.
Шийдвэрлэлт:
Автобусны гадна болон дотор талын хяналтын камерыг хянаж үзэхэд тухайн жолооч автобусны буудлаас зорчигчоо авч зорчсон бөгөөд гомдол гаргасан иргэн өөрөө буудлаас суугаагүй байсан.
Иргэний хүсэлт:
Шархад чиглэлд явдаг Ч:34 чиглэлийн автобусны тоог нэмэх. М:4 чиглэлийн автобус хоёр минутын зайтай бараг хүнгүй ирэх юм. Гэтэл Ч:34 нь 10 минут хүлээгээд ирэхгүй, ирсэн нь дүүрэн, хүнээ авахгүй байна. Ямар чиглэлийн автобус нь хүрэлцээ муу, ямар нь хоосон яваад байна гэдэг судалгаа байна уу гэсэн хүсэлтийг иргэн Нийтийн тээврийн бодлогын газрын фейсбүүк хуудсанд илгээсэн.
Шийдвэрлэлт:
М:4 чиглэлд нийт 45 автобус 2 минутын зайтай зорчдог бөгөөд өдөрт дунджаар 21 мянган зорчигч үйлчлүүлдэг. Ч:34 чиглэлд нийт 17 автобус 7 минутын зайтай зорчдог бөгөөд өдөрт дунджаар 7800 иргэн зорчдог. Иргэдийн зорчих тооноос хамаарч тухайн чиглэлд хэдэн автобус явах талаар төлөвлөгөө гаргадаг.
